CSS dahngheh hmaa PE dahnghehna sut an phut

CSS dahngheh hmaa PE
dahnghehna sut an phut
Centrally sponsored scheme hnuaia Mizoram sawrkara thawkte dahngheh zui an nih theihna tur dan siam hmanga anmahni zawk pawh dahngheh an awm hma in, sawrkarin provisional employees 31 a dahnghet chu hrethiam loin CSS hnuaia thawktute chuan he order hi sut leh an phut.
All Mizoram CSS Employees Coordination Committee (AMCECC) chuan 2025 August 21-a sawrkar lehkha tihchhuahah provisional employee 31 chu CSS Regularization Scheme 2024 hmanga dahngheh an ni a. He Scheme hi CSS employee tana duan ni siin, tun thlengin a scheme neitu CSS hnuaia thawkte dahngheh an la nih loh lai a, provisional employee hman tir a ni ngawt chu dikin an hre loa, he order hi 2025 August 29 hmaa sut turin sawrkar an phut tih an sawi
An beisei anga hma lak a nih loh chuan an kal zel dan tur an rel dawn tih an sawi bawk.
Kumin May 19-a sawrkar hnena representation an thehluh – CSS hnuaia thawkte an ngheh theihna tura sawrkar hnena an thlen tawh, ‘Government of Mizoram Regularization of CSS Employees Scheme 2024’ an hman theihna tura harsatna an tawh hrang hrang tun thlenga chinfel sak loin, hmalakna pawh la awmlo nia an hriat thu sawiin, a rang thei ang bera chinfel sak turin sawrkar an phut tih an sawi a ni.
‘High school zirtirtu (direct recruitment) mi 160 sawrkarin lak tuma file a kaltir mek hi AMCECC chuan tha a ti lo a, CSS hnuaia thawk mi engemawzat an awm lai leh CSS hnuaia thawkte dahnghehna atan sum harsat thu sawrkarin a sawi fo lai a, direct recruitment-a lak a tum hi tha kan ti loa, kaltlangpui lo turin sawrkar kan ngen a ni,’ a ti bawk.