Customer-te dikna chanvo humhim theihna tur ruahman

Customer-te dikna chanvo
humhim theihna tur ruahman
Centre of Excellence Consumer Help Desk kaltlanga mipui (consumer) ten an dikna chanvo an hriatzau theih nante, humhim dan tur leh kawng hrang hranga anmahni pui theitu ruahmanna – web portal, mobile apps man chawi ngai loa biakpawhna, toll free leh booklet chu hman theih tura tlangzarh a ni.
He hun hmanpuitu DP&AR changtu deputy chief minister Tawnluia chuan Mizoramah consumer-ten an dikna leh chanvo an la hriat tlem avang leh consumer (suma thil leitu) ten awareness an tlakchham avangin auality tha lo, buk diklo, a siam ni leh thih ni inziak lo, agent-in a tih tur a tih loh leh pawlh dal chungchangah sawisel emaw an dikna humhim tura ‘aw’ chhuah an la tim hle tih a sawi.
Hmanpuitu dang Consumer Affairs minister K Lalrinliana chuan mipuiin kan thil lei reng reng a dik nge dik lo tih te, buk a tling nge a tling lo tih te leh, a tha nge tha lo tih kan chik a ngai tih sawiin, consumer-ten kan dikna leh chanvo kan hriatna leh humhimna kawnga mipui kan inzirtir zel a pawimawh tih a sawi. Hetiang kawnga thil diklo kan tawng emaw thil fello a awm chuan District Consumer Forum-ah leh State Consumer Forum ah te complain nachang hriat a pawimawh tih a sawi bawk.
ATI leh DP&AR (Good Governance Cell) chuan “Setting up of Consumer Help Centre and Creation of Web Portal and Mobile App” tih chu sawrkar laipuia Department of Administrative Reforms & Public Grievances ah thehlutin, project hi pawmpui a ni a. Consumer-ten kan dikna chanvo neihte hriatna kawnga kan la thangharh tawk loh avang leh dan hriatlohna avanga dawrkai leh service provider-te buma kan la awm fo avangin Administrative Training Institute chuan chhawr tangkai turin mipui a sawm a ni.