Cyclone Remal-in Zawlpui Zaua thlai a tihchhiat nuai 40 chuang hu

On Jun 25, 2024 11 0

Kumin May-a Cyclone Remal thawkah Serchhip district Zawlpui Zau leh a chhehvela loneitute thlai chhia hlutna chu cheng nuai 41.92 vel a ni a, hei aia la sang thei a ni.
Cyclone Remal vanga Serchhip district huamchhunga chhiatna thleng chu sawrkar laipui Inter-Ministerial Central Team chuan Thawhtanni khan a hmunah an enfiah a. Serchhip bawrhsap David Lalthantluanga leh official dangten an lo dawngsawng.
A hmuna an enfiah hma in an thukhawm a. Serchhip DC office, Holticulture, Agriculture, PHE leh PWD ten anmahni kaihhnawiha chhiatna thlen dan an report. May 27 leh 28 a thlipui leh ruah avanga chhiatna nasa tak thlengah an district-a khaw hrang hrangah in 60 vel a chhia a, heng zinga 22 hi luahzui tlak loh khawpa leimin leh tuihawkin a tihchhiat an ni a, 38 erawh cheithata luah leh theih a ni. An district-a VC 54 atanga report a luh danin, hmun 23-ah lei a min a, report hi lut reng a nih avangin a danglam reng.
Serchhip district mipuiin leilet an neihna hmun Zawlpui leh a chhehvel chu nasa takin cyclone hian a tichhia a. Chhungkaw tam tak eizawnna hmun niin, chawhmeh – zikhlum, bawkbawn, hmarcha, tomato, vaimim leh a dangte an ching.
Report danin horticulture thlai hmanga eizawnga loneitu 152 a nghawng a. Chhiatna thlenna hmun hi hectare 130 vela zau niin, thlai a tihchhiat hlutna belhkhawm chu cheng nuai 41.92 a ni. Report hi danglam reng a nih avangin loneitute hloh zat hi la sang thei a ni.
Agriculture department-in loneitu lo 54 a tihchhia a, a hmunhma an fang tawh tih an report a ni. Serchhip district-a agriculture crop chinna hmun hectare 40 vela zau chu cyclone hian lo leh huan a tichhia a ni.
Thli leh ruah bakah tuihawk luang nasa avangin leilet hi leivungin a chhilh nasa a. Tuilakna, irrigation pipeline a tichhia. Kum tam tak intuak hnua an lei khawl ‘farm machinery’ a tichhia a. Mission for Integrated Development of Horticulture (MIDH) hnuaia siam Sihdarh Zau Green House East Lungdar a chhe hneh hle. An district hmun hrang hranga Green House Cluster dang 7 a khawih chhe bawk.
Serchhip tlawhtu Central Team-ah hian Department of Agriculture director Jintu Das, FCD deputy director Mahesh Kumar leh Ministry of Jal Shakti superintending engineer Rajveer Singh te an tel a. Zawlpui Zau leh Chawm leilet an fang a ni.