Cyclone thawk tur avangin chhimchhak vaukam inbuatsaih

Bay of Bengal atanga thlivir insiam chu cyclone chak tak, ‘severe cyclonic storm’ chang tawhin India chhimchhak tuipui kam hrula a nuai dawn avangin inralrinna kalpui a ni.
‘Cyclone Murasu’ tia a hming vuah hian Thawhtanni zan atanga Thawhlehni zan thlengin ruah a thlen dawn a, a tuar na ber tur chu Andhra Pradesh vaukam a ni dawn tih India Meteorological Department (IMD) chuan a sawi.
Murasu hian tuipui atangin Andhra Pradesh vaukama Nellore leh Narsapur inkar, Ongole hnaih laiah Thawhlehni zing khaw var hmain khawmual a kai dawn nia chhut lawk a ni a. Darkar khata km 110-a chak thli kengin a nat laiin km 120 pawh a kai thei dawn a ni.
Cyclone hmahruai hi Thawhtanni tuk atang khan thawk tanin Tamil Nadu-a Chennai leh a chhehvelah ruah tam tak a thlen a, khawlaiah pawh tui tling a tam hman hle a. Chennai Airport-ah chuan thlawhna thlawk leh lut tur eng emaw zat thulhtir a ni a, sikul leh college khar a ni a. Rel tlan pawh tihtawp lailawk a ni bawk.
Andhra Pradesh State Disaster Management Authority Managing Director Prakhar Jain-a chuan, “Mi 2,000 vel hmun him lova khawsate sawn chhuah an ni tawh a, sawn hna hi thawh mek zel a la ni a. Mi 30,000 vel sawn ngai hi an awm a ni,” tiin Reuters ​hnenah Thawhtanni khan a sawi.
Sorkar chuan national leh state disaster response force team hrang hrang an tir a, tirh chhuahte bak pawh inralrintir an ni a. Odisha leh Telangana-ah pawh ruah sur nasa tur lakah inralrinna sang ber dawt, orange alert tihchhuah a ni.
Tual chhung thuneitute chuan sangha mantute chu tuipuia chhuak lo turin an hriattir a, mipui pawh thuthang dik lo rinchhan lova sorkar thuchhuak ngaichang reng turin an ngen a ni.
Cyclone Murasu hi kar hmasaa Cyclone Arnab aia chak lo zawk tura ngaih a ni a. Arnab avang hian Andhra Pradesh leh Odisha-ah mi paruk an thi a, chenna in tam tak leh thlai chin hmun zau taka mi a tichhia a ni.
Arnab thawk hi Andhra Pradesh-in an tuar na ber a, thil chhiate pawh siam that leh tun din that a la ni lo va, mihring pawh 1,80,000 chuang sawn chhuah an ni a, heng mite pawh hi mumala an awmna pangngaia an kir leh hmain Murasu-in a nuai zui leh dawn a ni.