CYLA-in tualthattu manchhuah kawnga pui turin ngenna siam

CYLA-in tualthattu manchhuah
kawnga pui turin ngenna siam
Lawngtlai district-a tlawmngai pawl lian ber Central Young Lai Association (CYLA) chuan tunhnaia Siaha mi pahnih leh South Lungpher mi pakhat thihna chu pawi an tih thu sawiin, pawikhawihtute manchhuah thuai an nih theihna’n Myanmar lama Zohnahthlakte hma la chak turin an chah.
Central YLA thuchhuak chuan, March 22-a India leh Myanmar ramria misual kut tuara boral – South Lungpher YLA member B. Lalthafamkima leh New Siahaa khawsa Biaksuii leh Bablu-a, MRHG te thihna chu pawi an tih thu leh mitthi chhungte an tawrhpui thu an sawi a. He tualthahnaa inhnamhnawihte an dem thu leh Mizoram leilung fa ngeiten hetianga thil duhawm lo an tawk chu an rilru a nain tun hnuah thleng tawh lo se an duh thu an sawi.
He thihnaa inhnamhnawihte zawnchhuah leh man kawngah a theih ang angin Central YLA chuan hma a la nghal tih sawiin, A theih ang anga thawhpui turin Mizoram mipui leh Myanmar rama an unau zawng zawng an beisei tih an sawi a. A bikin Myanmar buaina avanga zalenna sualtu pawl hrang hrang – CDM, CDF, PDF, CNA leh a dangte pawh he thihna chungchanga pawikhawihtu leh inhnamhnawihte manchhuah thuai an nih theihna’n hma la turin an beiseiin an ngen tih an sawi a ni.
Myanmar buaina avanga sahimna beiseia anmahni rawn beltu unaute chhawmdawl hna theihtawp chhuaha an thawh lai a, hetianga thungrulh an ni chu Central YLA chuan a hrethiam lo takzet tih sawiin, ‘Hetiang thil a thlen tawh lohna tura mahni mi leh sa te thunun tur leh khuahkhirh turin Myanmar lam unau zawng zawng kan beisei a, Central YLA pawhin Mizorama rawn raltlante enkawl kawngah khauh zawka khuahkhirh an nih theihna turin ruahmanna a siam nghal a ni,’ a ti.
Myanmar-a Mizo unauten an ram buaina avanga an harsatna tawh chu an hriatthiampui rualin, an buai avanga Mizoram mipui an thlabar an phal lo tih Central YLA chuan a sawi a. Myanmar buaina remchanga laa, Mizoram mipui zingah hlawkna beiseia dan phal loh thil – ruihhlo leh ralthuam tawlhruk lama inhnamhnawih lo tur leh, hetiang thil titute thawhpui lo turin mipui a ngen tih a sawi a. Sahimna beiseia raltlante himna chu an duhpui a, an ngaihpawimawh ber erawh Mizoram mipui himna leh damna a ni tih a sawi bawk.