CYMA-in faina hnatlang buatsaih lo turin sawrkar ngen

Central Young Mizo Assioation chuan thuchhuah siamin, Prime Minister hmalaknaa India ram mipuiten a huhova darkar khat chhung faina hnatlang ‘Ek Tareekh, Ek Ghanta, Ek Sath” nei tura ruahmanna a siam chu Pathianni a nih avangin Mizoram sawrkar chu faina hnatlang buatsaih lo tur leh hun remchanga buatsaih zawk mai turin an ngen.
Prime Minister hmalaknaa India ram mipuiten a huhova darkar khat chhung faina hnatlang nei tura ruahmanna a siam chu tha an tih thu an sawi a. Hnatlang neih ni tura ruat October ni 1,2023 chu Pathianni, kristiante tan ni serh leh Pathian kan biakna ni a nih avangin, hemi nia faina hnatlang neih hi YMA chuan a remchan loh thu an sawi a. India ram, sakhaw zalenna rama sakhaw pakhat ni pawimawha hetianga ruahmanna siam a ni chu tha an tih loh thu sawiin, kristiante Pathian biakna ni ngaihpawimawh lohnaah an ngai tih an sawi.