Hmasawnna nasa zawk thlentir turin MNF sorkar leh dawn: CM Zorama

Chief minister Zoramthanga, MNF president chuan Mizoram hmasawnna nasa zawk thlentir turin Pathianin MNF a sorkar-tir leh ngei dawn, a ti.
Zirtawpni khan MNF Aizawl South I Block Conference hmanpuiin thu a sawi a, MNF chu a din tirh a\angin rinawm takin a dinna ngaiah kum 60 chuang nghet taka ding tlat a ni tia sawiin, dinhmun sawhsawn ve mai mai ngai lo party a ni a ti a, harsatna tam tak paltlanga Pathianin a lo hruai chhuah tawh MNF party hi Mizoramin a tawh mek harsatna period a\angin Pathianin min hruai chhuak dawn a, malsawmna period-ah min sorkar-tir leh ngei dawn a ni, a ti.
An khingpui party pahnih chungchang a sawi a, Congress chu an term a tawp thawkhat tawh tiin a sawi a, central leh state-ah an tlahniam hle a, inthlan dawt lehah an dinna tur bialah pawisa dahkham dawn ta ila, kan dah huai ngam lo khawp ang, a ti.
ZPM chu Lunglei Municipal Council leh by-election \henkhatah an han sang deuh a, an kalphung buai avangin tunah chuan an hniam raih raih tawh, a ti.
“ZPM chu party politics duh lova movement tih hming pua bul rawn \anin, politics boxing ring chhung an luh hnuah an tum dan leh kalphung an thlak leh tawh a, Election Commission of India-ah party recognition an dil a, an duh loh an luak hnu kha an rawn ei leh vek tawh a ni,” a ti.
ZPM chuan sorkarna lo siam tawhtute zawng zawng chu hmasawnna hna thawk lo leh chhe ta veka puhin beidawnna ruamah Zoram hi dah vek an tum a ni, a ti a, ZPM leader-in ‘Chakma vote kan mamawh lo’ tih thu a sawi leh, a hnuah CADC-ah unit an va din leh si tia sawiin, ZPM leader chuan sawi awm loh tak a sawi \hin a ni, a ti.