CYMA-in raltlante a tlawh

CYMA-in raltlante a tlawh
Central YMA chuan Zirtawpni khan Burma atanga raltlan Zokhawthar camp-a awmte a tlawh a. Sub Hqrs YMA Champhai hruaitute, Tuipuiral Group YMA leh Vanhnuailiana Group YMA hruaituten an tawiawm.
Zokhawthar khawtlang hruaitute nen an inkawmnaah Central YMA president R Lalngheta chuan Zokhawthara Myanmar atanga raltlante dinhmun chiang tak hriat an duh avangin a hmunah an kalchilh tih a sawi a. Raltlan awm rei tawh leh awmnghet deuhte chu ei leh in anmahnia an indap tir dan zawn ho a tha tih a sawi. Raltlan an pung zel a, tanpuitu an tlem tial tial a, tan lehzual a ngai dawn, tia sawiin, “Kan unaute an ni a, kan unauten min rawn bel a nih chuan kan hnar tur a ni lo. Kan theih ang angin kan lo tuamhlawm tur a ni,” a ti.
Zokhawtharah hian tunah raltlan 5604 an awm mek a. Zokhawthar field-ah an chenna in tur siamsak an ni a, an len loh avangin hmundanga sawn tum niin, a sawnna tur in sak mek a ni.