CYMA-in ramri hung an duh loh thu Union Home secretary an hrilh nawn

On Jan 29, 2026 2 0

Sawrkar laipui Ministry of Home Affairs (MHA) hmun New Delhi-ah MHA hotute leh Central YMA hruaitute chu Thawhlehni khan an thukhawm a. Central YMA hian ramri hung an duh rih loh thu an sawi nawn.Thutkhawmah hian Union Home secretary Govind Mohan hoin MHA hotute, Intelligence Bureau, Assam Rifles leh Border Security Force hotute an tel a. Central YMA hi an president R Lalngheta hoin vice president Prof. Lalnuntluanga, general secretary Prof. Malsawmliana leh treasurer Er H Duhkima te an kal. Mizoram chief secretary Khilli Ram Meena a tel bawk.
2025 March 15-a Union Home minister-in Mizoram a tlawh tuma Central YMA leh NGO dangten thu an thlen bawhzui a nih dan sawi a ni a. Chu’ng zingah chuan – ruihhlo dona atana Central YMA hnena Narcotics Control Bureau kaltlanga lirthei leina tur Rs. 88,95,675 ruahman a nih tawh thu, ruihhlo do kawnga inzirtirna lama hmalakna tur cheng vaibelchhe 2.3 ruahman a nih tawh thu, Thingsulthliah rama YMA Conference Centre sakna atan cheng vbch. 99.7 dah a nih tawh thu, 8th Schedule-a Mizo tawng dah a nih theihna tura ngenna chu diltu 150-200 vel an awm avanga Committee dinin an ngaihtuah tur thute sawi a ni. Hei bakah hian Mizo thalaite tana Civil Service Coaching Centre buatsaih mek a nih thu leh Airport Authority of India kuta Lengpui Airport hlan chungchanga thil awm dan sawi a ni bawk.
Thutkhawmah hian Indo- Myanmar ramri hung chungchanga YMA ngaihdan zawh an nih angin, Central YMA hruaitute chuan, NGO Coordination Committee thu dinglai angin ramri hung hian Zofate inunauna a tihchhiat theih dawn avanga hung rih loh an duh thu leh, Mizoram State Assembly pawhin resolution a lo pass tawh thute; Indo- Bangladesh ramri hungah Mizoram-in nasa taka ram a chan dan leh hung pawna khaw engemawzat a awm thu sawi a ni
Indo- Myanmar ramri hung turah hian survey neih mek a nih rualin, ramria cheng mipuiin ramri hungin a ken tel tur an hriat loh thu leh eng angin nge a nghawng dawn tih inhrilhfiahna a awm loh thu Central YMA hruaitute hian an sawi bawk.
Tunah hian Indo- Myanmar ramri hung atan hian Border Roads Organisation chuan survey a nei mek a ni.