Cyr wheel a vir rei thei record siam

Daniel Craig tih chuan i rilru-ah James Bond changtupa a rawn awm nghal a, mahse, he Daniel Craig hi chu Hollywood star ni lovin Winnipeg, Canada a cheng, acrobat a ni a, cyr wheel a vir lam thei chungchuang tak niin, Guinness World Record a siam ta a ni.
Daniel Craig hian cyr wheel a vir hi kum 30 vel zet chu a lo tuipui tawh a, tun tumah hian minute 40 leh second 8 chhung chawlh awm miah lova vir charin charin, cyr wheel a vir rei thei record a siam ta a ni.
Cyr wheel chu thil bial lian tak a ni a, aluminium emaw steel emaw an hmang thin a, hula hoop lian deuh ang a ni mai. Chu thir bial chhungah chuan dingin, an kut pahnih leh ke pahnih hmangin an inham tang a, tichuan an vir kual ta vel thin a ni.