Dal theih loh City leh Haaland

April 15, Inrinni zana English Premier League khelhah champion lai Manchester City chuan 3-1 in an mikhual Leicester City an hneh a, hmahruaitu Arsenal an hnaih leh zual. Foxes an hneh tum hian Erling Haaland chuan khel tluan lo chungin goal hnih a thun a, goal 32 thun tling tawh Haaland hian EPL record thar siam a hnaih a hnaih zual zel. City an chak lai hian London club lian pahnih Chelsea leh Tottenham te chu an khelmualah an tlawm ve ve thung.
Salah nihrualtu Haaland
Champion lai Manchester City hian Etihad Stadium-ah table hnuai ber dawttu-a awm mek Leicester City an mikhual a. John Stones leh Erling Haaland goal hnih thun hmangin hnehna an chang a. Foxes tan hian Kelechi Iheanacho chuan goal khat a thun ve bawk.
Hmahruaitu Arsenal nen an inkar tizim tura chak mamawh City hian an mualah bul an tan tha viau a, goal pawh an thun thuai. Inkhel tan atanga minute 5-na lekah defender John Stones chuan buai nuaih nuaih kar atangin, tha zetin a pet goal a, hmahruaina goal a thun. Tlakhniam pumpelh tuma thih tha nen meuha tan khawh Leicester lakah goal an thun thuai vangin City an khel tha chhunzawm a, hahdam zawkin an mualah an inlan zui theih phah.
Stones goal thun hnuin City hian an mikhualte an nawr chhunzawm zel a, minute 13-na lekah hand ball vangin penalty an hlawhchhuak zui leh nghal. He penalty hi Erling Haaland chuan awlsam takin a pet goal a, an hmahruaina tizau turin an goal hnihna a thun.
Goal hnih thun tawh City an khel tha chhunzawm zel a, goal dang an thun belh leh thuai, Minute 25-naah Haaland chuan Kevin de Bruyne siamsak atangin City goal thumna a thun a, an hmahruaina a tihzau belh. Minute 25 chhung leka City in goal thum ngawt an thun hman vangin chak tur zawk tihchian a ni tawh ang hial a ngaih a ni a. City hian goal eng zat tak thun belh ang maw? tih chu inkhel entu zawng zawngte zawhna a ni.
Team lian lakah chhe takin bul tan mah se Leicester City an insiam tha hret hret a, goal an chhuah belh loh bakah goal an thun ve ta hial. Minute 75-naah Kelechi Iheanacho chuan goal thunin an si phurh a sut then. Manchester City player hlui Iheanacho hian hun tawp dawn tepah goal dang a thun belh teuh hle a, si nghak pet kan tawh mah se goal post in City a chhan him hlauh thung. Foxes hian point hlawhchhuah ngei tumin thapui thawh zuiin, hun tha neih belh bawk mahse goal an thun belh thei lo va, dinhmun chhe leh zual zawka ding turin an tlawm zui ta a ni.
Leicester City an hneh vangin Manchester City hian hmahruaitu Arsenal an hnaih leh zual sauh a, Gunners nen an inkarah point thum chauh a tla zep tawh. Arsenal hian Pathianni zan khan West Ham an hma-chhawn a, an chak a nih chuan City nen an inkar ah point ruk a tla zep nawn leh thung ang. City in champion beisei sang zawk an neih belh laiin Leicester City in tlak-hniam an hnaih tulh tulh thung a. Foxes hian khelh 31 atanga pont 25 hmuin 19-na an luah mek.
Leicester City an hneh tuma goal hnih thun Erling Haaland chuan season kal mekah EPL goal 32 a thun tling a. EPL-ah khata goal thun hnem ber record siam turin goal thum chiah a mamawh tawh. A dam tha pangngai a nih chuan Haaland hian record thar a siam ngei tura ngaih a ni a. EPL chanchinah season khata goal thun hnem ber chu goal 34 ve ve thun Alan Shearer leh Andy Cole te an ni. Liverpool forward Mohamed Salah hian season khatah goal 32 a lo thun tawh a. Hei hi EPL-ah team 20 an awm hnua season khata goal thun hnem ber a ni ve thung. Haaland hian Arsenal an hmachhawn hunah Salah tlanpelh theihna hun tha a nei thei dawn a. Shearer leh Cole te record khum turin Arsenal lakah hattrick a siam a ngai dawn thung.
Goal thun thulh thei lo Haaland hian season kal meka inelna hrang hrangah City tan vawi 40 khelin goal 47 zet a thun tawh a. EPL player zinga season khata goal thun hnem ber record a lo siam tawh a tizau zual zel a. EPL leh Champions League-ah fal takin top-scorer a ni dun mek bawk. City manager Pep Guardiola hian team tana tha tur a ngaihtuah vangin Haaland a hahdamtir fo va, double hattrick a siam theihna tur te, Hattrick a siam ngeina tura ngaih leh record thar a siam theihna tur ngei ngeiah pawh Haaland hi a la chhuak tho thin a. Chuti ni lo se..Haaland hian Alan Shearer leh Andy Cole te record a khum fel tawh ngeiin a rinawm.
Chelsea leh Spurs an tlawm
Inrinni zana inkhel dangah London team lian pahnih; Chelsea leh Tottenham Hotspurs te chu an khelmualah ngei an tlawm ve ve.
Chelsea hian Stamford Bridge-a an mikhual Brighton lakah Conor Gallagher goal hmanga hma an hruai hmasak zet hnuin Brighton tan Danny Welbeck leh Julio Enciso te goal thun vangin tlawm zawkah an tang a. Manager lailawk Frank Lampard hnuaiah vawithum an tlawm zawn tawh chiah.
London club lian Tottenham pawhin an mikhual Bournemouth chu 2-3 in an hneh lo ve bawk.