Zhang lakah Joyce a tlawm

BBC-a Sport ziaktu Frazer Clarke-a’n palian boxer tha zual pathum zinga a chhiar tel Joe Joyce chu Pathianni zing khan a vawi khat nan a tlawm a. Zhilei Zhang chuan WBO interim heavyweight champion Joyce hi round ruknaah knock-out in a hneh.
Copper Box Arena, London-a inhnek ngaihven hlawhah rinkai ni phak lo Zhilei Zhang a khel tha viau a, a phu ang ngeiin hnehna lian a sualchhuak. A kut vei lam hmanga a hnekna na tak vangin Joyce mit ko a vung lian hman viau a, round 12 thleng inhnek tura ruahman ni mah se round rukna lekah inhnek tihtawp a ngai ta hial a ni.
Zhang hian tualchhung boxer Joyce lakah bul a tan tha a, round khatnaah hnekchhuak tam zawk leh hnek fuh ngun zawk a ni a. Round hnihnaah fuh zeta hnek fuhin Joyce a talbuai hman viau a, tlawm a pumpelh hlauh thung. Round thumnaah Joyce insiamtha hret mah se round linaah hnufual zawkah a tang nawn leh a, tlawm pumpelh turin insiamthat a mamawh viau tawh.
Round rukna tan a nih dawnin doctor in Joyce-a mit ko vung nasa tak a endik a, inhnek hmachhawn zui thei tura ngaih a ni phawt. Round rukna tir lamah Zhang-a’n chiang zeta a hnek fuh zawn leh hnuin Joyce hliam hi endik nawn leh a ni a, inhnek zui tlaka ngaih a nih loh vangin inhnek tihtawp a ni a. Tlawm nei lova kaltluang mek hmachhawn tura ngaih Joe Joyce chu Zhilei Zhang lakah knock-out in a tlawm ta a ni.
Inhnek vawi 15 a hmachhawn tawha la chak vek Joe Joice hi palian champion Oleksandr Usyk hmachhawn tura inbuatsaih a ni a. Amah anga thova Olympic Silver medal lo hlawhchhuak tawh Zhilei Zhang lakah a tlawm vangin Usyk hmachhawn a beiseina par a chuai ta rih. Joyce knock-out tu Zhang hi Ft 6 leh inches 6 zeta sang a ni a. Kum 2008 Olympic-ah khan Silver Medal a dawng a. Professional huangah inhnek vawi 27 hmachhawn tawhin vawi 25 a chak a. A hneh mi 25 zinga 19 zet a knock-out. A khingpui pakhat nen an inhnehtawk a, tlawm zawkah vawi khat a tang tawh bawk.
Zhang laka tlawm Joyce hian kum 2016 khan Olympic-ah Silver Medal a hlawhhchuak a. Professional huangah vawi 15 chak zawn a, a hming a chher len lai takin Zhang lakah a tlawm ta a ni. A vawi khat nan a tlawm hnuin Joyce hian inhnek hmachhawn zui zel a tum thu a sawi a, World champion nih a tumna puitlin ngei a la tum fan.