Daily Newspaper

Damchhunga nupa ni turin engtin nge i tih ang?

15

Kan tunlai khawvelah hian inhmangaihna pawhin expiry date a nei emaw tih mai tur hi a ni tawh a, mahse, mi zawng zawngin damchhunga nupa hlim tak nih erawh kan duh theuh si. A kum telin nupa inthen kan pung a, chutiang karah chuan engtin nge damchhunga nupa inkawp hlim tak ni turin kan tih tak ang? Tun tumah hian relationship lama mithiam ten nupa nun daih rei theih nan a tha an tih te kan rawn tarlang e.

Sexologist Dr Rajan Bhosale chuan nupa nun daih rei tur chuan bedroom nun a pawimawh hle niin a sawi a, “Miin an nupa bedroom nun an hmang regular hle ni a an sawi Hian an inlaichinna a tha tihna a ni nghal mai lo. A changin a hmeichhia zawkin a pasal chuan a mood lam pawh ngaihtuah hmasa lovin a nawrlui anga ngaihna te pawh a lo nei fo mai thei. Mipain a nupui chu bedroom nun a hmanpui hmain a tiphur ngai lem lo emaw, a inpeih hun a nghak lem lo emaw, a duhtawk hun a nghah pui lo emaw te pawh a ni thei. A tu emaw zawk zawk pawhin an duhkhawp an hmu lo fo a nih chuan an inkarah inzawmna tak tak a awm theih loh phah thin a, chu chuan nupa inlaichinna a tibuai thei. Bedroom nunah chuan nupain an che dun tur a ni a, a tam lam emaw a regular lam emaw a ni lo va, a quality kha a pawimawh zawk chu a ni. Mahni nawmna leh mahni chak zawng leh chak dan ringawt ngaihtuah lo va inngaichang tawna bedroom nun chu hman tur a ni,” a ti.

Nupaa bedroom nun hlim taka hman hi taksa hrisel nana a that mai piah lamah kan bedroom nun hman laia kan inhmangaihna avanga hormone lo chhuak chuan psychological leh physiological-ah hlawkna min thlen thei a ni.

Kawppui te nen a titi leh thil sawi dun thin a pawimawh hle. I nileng hun hman dan mai mai te pawh inhrilh tawn ula. Nupa chu chu thil sawi dun tam tur a ni a, titi dun tam tur a ni, chu chu nupa nun phuar nghettu pawimawh tak a ni. Dr Bhosale chuan, “C pali pawimawh tak a awm- Clear, Complete, Caring leh Continuous. I kawppui kha rilru hrethei a ni lo tih hria la, chuvangin in titi dun a, thil insawi dun thin a pawimawh a ni,” a ti. Thil sawi dun laia khawdang inhawisan mai mai lo va, an thusawi kan ngaithla a ni tih lantir nana eye-contact neih zauh zauh te a pawimawh, kan thusawi a ngaihthlak ang chiahin a thusawi kan ngaithla ve tur a ni.

Psychologist Seema Hingoranny chuan, “Mipahnihin an thusawi te an inngaihthlak sak tawn a, sawina tur hun an inpek thiam a, ngaihthlak huna ngaihthlak an thiam hi a pawimawh ber a ni. I kawppuiin a thusawi chu uluk taka i ngaihthlak chuan, a sawi chhuah lem loh a rilru tur awm pawh tam tak i hre thei ang,” a ti.

Nupa inlaichinnaah inhnial leh inhauh chang a awm lo thei lo, chutiang hunah chuan a tihdan kan thiam chuan inhnial leh inhauhna te pawh nupa min phuar nghettu a ni zawk hlauh thei. Seema chuan, “Nupa inhauh reng rengin mimal taka inbeih loh tur a ni a, mahni thiam inchantir tum sa ran loh tur a ni. I kawppui chu i kawppui a nihnaah zahna lantir la, in inhnial thinrim lai pawhin a chak lohna te phawrh lan sak kher suh,” a ti.

(chhunzawm tur)

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy