Damdawi in tan hmanrua hlan

Rotary Club of Aizawl leh a thawhpuiten Aizawl Adventist Hospital 7th Day Tlang hnenah hmanraw mamawh chi hrang hrang an hlan.
A hlanna inkhawm Ningania an damdawi in hmun, 7th Day Tlanga neih hmanpuitu, Past District Governor, Rotarian Subashish Chatterjee chuan Pathian thu in midangte hmangaih tura min zirtirna tihhlawhtlinna chu, midangte harsatna sukiang tur leh an mamawh leh thatna tur ngaihtuah sak a ni, tiin, tuna damdawi in-in Rotary Club kaltlanga khawl thar a neihte pawh mipui, harsa zawkte tan tangkai taka an hman a duhsak tih a sawi a. Rotary Club chu mi harsa zawkte tana ding thin a ni tih a sawi bawk.
Rotary Club of Aizawl president kalchhuak tur, rotarian Ranjit Singh chuan an Club hi kum 1992-a ding tanin, Rotary Club chu midangte rawngbawl sak tura pawl din a nih angin, kawng hrang hrangin mipui leh khawtlang tan hma an la ve thin a. Aizawl Adventist Hospital nen hian kum 2013 vel atang thawk dunin, damlote tan hlawk zawka tha an thawh duh avangin tuna khawl thar tur hi an er a, an club member mi 33-in cheng nuai 24 an thawhkhawm bakah Rotary Club of San Bernardino, California USA leh Rotary International District – 3240, 5330 leh 3220 ten sum leh pai an thawhpuina nen an tipuitling thei ta a, he project-a sum sen zawng zawng hi cheng nuai 58.54 niin, neonatal ventilator leh Laporoscopic Surgery Set bakah oxygen, air and vacuum pipeline te a ni.
Rotary Club of Aizawl secretary, Aizawl Adventist Hospital medical director ni bawk Dr Eileen Lalrinpuii chuan heng hmanrua nei tura hma an lak dan leh Rotary Club hnathawhte sawifiahin, an damdawi in in heng hmanrua a neih theihna tura tha thawhtu zawng zawngte chungah lawmthu a sawi a ni.