Damdawi in tha zingah Tawipui PHC

Damdawi in tha zingah Tawipui PHC
India rama sawrkar damdawi in tha bik tehnaah Tawipui Primary Health Centre a tel thar a, heti hian Mizorama HWC -PHC 58 awm zinga 29 chuan national NQAS certificate an nei tawh.
National Quality Assurance Standards certified damdawi in hi endikna chhawng thum paltlang an ni a, a tawp bera an endikna hmachhawn hi National External Assessment a ni. Hetah hian 70% an hmuh chuan certified an ni chauh thin. Heng certified tawh damdawi inah hian natna darh thei ven kawngah, thawktu zawng zawng an hna bil thiamna, an level zelah enkawlna an pek that dan, a thlawna enkawlna leh damdawi pek, damdawi in faina leh dik taka damdawi in bawlhhlawh sawngbawl, hawihawmna leh a chhehvel vawnfai kawngah, environment vawnthat kawnga endik an ni.
National Health Mission Mizoram mission director Dr Lily Chhakchhuak sawi danin, NQAS-ah Tawipui PHC hian 84.78% a hmu a ni.
Heti hian Mizorama sawrkar damdawi in 42 chu NQAS national certificate nei tawh an ni a. Tunah hian sawrkar damdawi in 19-in state level certificate neiin national certificate result nghak mek pahnih an awm.
Health & Family Welfare minister Lalrinpuii chuan India ram damdawi in tha tehnaa tling thar Mizorama sawrkar damdawi in kan neih belh zel chu lawmawm tiin, thawktute chungah lawmthu a sawi.