Damdawi ina thihna vangin buaina, doctor-in hna thawk lo

Pathiannia damdawi ina damlo thihna avanga thinrim mi eng emaw zatin Manipur khawpui, Imphal-a damdawi in lian ber luhchilhin an suasam a, hei vang hian doctor pawl chuan an hna an chawlhsan a, outpatients’ department leh emergency care pawh an ti lo.
Hmeichhia kum 35 mi chu Regional Institute of Medical Sciences (RIMS)-a naute hmeichhia zai chhuahsak a nih hnuah a thi a, a chhungte chuan thawktute inthlahdah vangah an puh.
A chhungte hian damdawi in hung chhungah lungawi lohna an lantir a, eng eng emaw suasamin doctor kut an thlak a. A hnuah an thenawmten an tawiawm zui a ni.
Teachers & Medical Officers Association (TAMOA) chuan senior consultant kutthlaktute man chhuaha hrem an nih hma chu an hna an thawk chhunzawm tawh dawn lo tih an puang zui a ni.
RIMS thuneitute chuan ‘a hun lo taka hmeichhe thihna’ pawh an tih thu leh an chhungte an tawrhpui thu an sawi a, thil thleng chu ngun taka chhuiin hma an la zui dawn tih an sawi bawk.
Damdawi in hian bungraw suasam leh beih chu an dem a, dan anga hma lak zui a nih tur thu an sawi.
Vantlang bungrua suasam, damdawi hmanga mi enkawltute tihbuai leh tharum tahwh hi dan lo a ni a, khatianga chetna khan ni tin mamawh inenkawlna a tibuai a, dan anga hma lak a nih tur thu an sawi a ni.
RIMS hian mi tinte muanawm taka che turin an ti a, vantlang thilte dima dan ang taka thil kalpui a nih theih nana pui turin an ngen.
Hetih lai hian TAMOA chuan ‘dik lo taka puhna’ an dem thu leh an pawla tel doctor kutthlak a nio chu an dem tak zet tih an sawi a, RIMS-a an hna thawh zawng zawng an tawpsan dawn a. A titute man chhuaha hrema an hna thawhna hmunah an him tawk tih a chian hma chu an chawl dawn tih an sawi.
Association hian tuna damdawi ina awm sate erawh enkawl pangngaia an enkawl zel tur thu an sawi thung.