Damdawi mum lian Commedian Search (Kick Off 2023 kha)

By Lalnun\awma Fanai

Thlazing ni 4, 2023 (Zirtawpni) a ni a, Civil Hospital Cardiology deptt kan tlawhna chu In lamah ka edit a, ka khawl chhe ngai lo a chhe pek a, chu chuan min tibuai hle! Ni lêngin kan buaipui a, hmasawnna a awm lo. Thin a ur a, computer keyboard te chu ka en ngawih ngawih a, tharum a hnai thuak thin. Nghak hret nun zir thang ka lo ni hlauh a, him damin kan inchhuah a ni mah zâwk.
Heti teh hrepa ka tul ni len lai hian, Commedian Search Chief Judge H. Rotluanga’n, Commedian Search Kick Off-naah tel ve tur leh thute sawi tura min sawm avângin, chu chuan min kam reng a, awmdan thiam a har hle. Tlai a ni a, ka hman hun min zâwt an awm ta reng nen, kal ngei chu ka tum ruh ta hle a. Hun tiam awm lo mah se, tum aia tlaiah Muallungthu lam pan chuan ka chhuak phei ta a ni.
Silai mual, Trinity Hospital sirah Darrokima nen min lo nghah thu Pu |hatea (Bematuale) chuan a rawn sawi chhen a, ruah hmi do nen, min tur sek chu ka ning reuh hle. Min nghah rei avânga Dara laka a inthlahrun thu sawiin, Dara motor lam kan pan thuai a, thubuai a intan ta! A hmaa chuang tura inngaihna kha ka nei lian sa hle a, chuti maiin a awlsam lo. Upa zâwk chan a chang a, nui ham ham pahin min kian fel ta a ni. ZMC Gate pui kan tlân pel a, motor a rui ta hlauh mai, “A hmaah ka lo chuang ve mai teh ang, ka rui der mai,” a ti a. Chu thu avâng chuan thang âwk lâk lai ang maiin hlimnain ka khat a ni. LPS FTH Channel-a Zeldin Titi-ah Zephyr-a nen min zeldin thin a, motor ka ruih thin thute chu uar fea sawiin nasa takin an nui lui thin a. Vanneihthlak takin Dara chuan a phur rui ve ta a ni si. A motor rui chu Zo ar tui tla ang maiin a khawr hlen reng a. Phuba lâkna ang hrima thiante motor rui ka lawm ru chiam erawh dikin ka hre ta lo a, a motor rui nun nguai chu tawmpuiin ka ngawi zui ve ta a ni.
Zephyr-a huan kan thleng a, rin aiin a lo changtlung daih mai. Kan commedian high class rualte chu an lo thu ngawi thap a, ‘Inhau an awm em mawni chu le,’ tih ngaihdante kan nei hman. Kan han inchibai a, a taka kan la hmuh loh hlir an ni a, nel dan tâwk thiam har ka ti hle. An zinga ka hmelhriat hriat tha ber, ka innghah ve na ber Sanga (Thangthuama) lah chuan min pel fua fua a, mipa insiam rim a nam a, a rimtui fu bawk si. Kamis var nalh tak a ha a, a bilh lut thlup a, a hmel enin a lo awm hahdam tawh tih hai rual a ni lo. ‘Mizoram University a II BA exam result endik zo, ‘Kei ber ka thlen tlai chuan a dik lo ang e,’ tih rilru pua hma taka a hmun thlengte pawh a ang alawm le,’ tiin Dara’n a sawisa a, insum chi ziazang a ni lo. Kan nui khur tan ta. Chu chuan min titlangnel tan hle.
In chungah kan chho a, Commedian Search 2023 khuhhawnna hun chu kan tan ta. An nuihza siam chu a nuihzatthlak emaw, nuihzatthlak loh emaw, nuih luih chiam tur nge, inti mi tak deuhin milian nuihin za vak loin ka nui thin dawn tihte chu ka inzawt a, ho tan riaua inhriatna ka nei a. Kan chairman Sanga bulah min thut tir a. Amah chauhin programme sheet a nei a, hawrawp zahpuiawm fê fê hian kan hun neih dan tur chu a tlar thla nuai a. Uluk taka ziah nge chawh chhiat tam ang tihte chu ka zu chhiar ru dawn a, a lek sawn thuai zel si a, en a har hle. A tawp ber dawttuah ka hming chu ka zu hmu a, a tawp berah Pu |hatea chu thusawi turin an dah a. Keini pahnih karah chuan, a sawi hmasa sa vanduai, a sawi hnuhnung hnung vannei kan nihna lai a awm dawn tih kha ka hre kar mai si a.
Fiamthu thiam rual kal khawm an ni bawk a, a bul kan tan atangin keimahah boruak a inthlak nghal hlawk a, ka ngampa ta hle. Nula hmeltha angreng tak pahnih hi an awm a, eng mi nge an nih tihte chu ka zâwt a, pakhat chu commedian search host tur a nih thu leh nikumah pawh a host tawh thu min hrilh a. Nuihna lamah ka lo insawrbing deuh thin nge, ka lo en kân zâwk nge, a hmai an chei bo zo nge te ka ti a, ka nui ru kur kur a.
Sanga chu ka kheuh a, a rûkin a tawp bera thusawi chu ka dil a. Khatia ka han hrilh ru kha, betu dang an lo awm nen, a ruala chhân vek a tum avângte pawh a ni mai thei e, ‘Engtin maw?’ a ti deuh hû reng mai a, “Nang hi biak apiangin engtin maw i ti reng mai a, in sorkar lai chuhin bengdar tha chi i vuah thuai a ngai a nih hi,” ka ti rilru a. A ruala betu chhân rual vek a tum avângin ‘eng maw?’ a tikual vel ta ni berin ka hria a, a thil tawn leh a nun rem fel a ngai a nih hi tiin thutlukna ka siam ta a ni. Ka ngen rûkna chu min pawmsak a, ka lawm hle. Sanga beng a chhet lo.
A hnuhnung bera thusawi tura ka inngaih fel hnuah, Chairman Sanga chuan hotupa ber tiin Chief Judge H. Rotluanga chu a va rawn a, a buai zo leh ta. An inhrilhru lai chu ka hre pha a, ‘Pu |hatea hi a zai tel dawn a, a thiannu Lalngengpuii Tochhawng pualin hun a hmang pah dawn a, zaiin hun khar se a tha ang, a thiannu boral hi a sun nasa si a,” tihte kha ka va hre pha riai ruai a. An ruahmanna chu a zahawm hlein ka hria a, ‘E khai, khatiang a nih chuan in duan hmasak ang khan kalpui rawh u, Pi Ngengpuii thlarau pawh a zahawm alawm le,” ka ti a, a bu nghut nghut a. Hetiang tawngkam zahawm taka thil ka sawite hi Sanga hian a hre mumal pawhin ka ring lo. A ruala betu a ngah êm a, Vawk kaw chhunga lut Nuaia aiin a buai zâwkin ka hria. Ka hun tawn tur erawh huphurh ru angreng takin ka nghak ta a ni.
Kan fiamthu thiam larte chuan hun an rawn inhman chhâwk a, awmze nei taka hun duansak an ni tih hai rual lohin hun an hmang thiam hle. Kan nui kan nui ta mai a, nuih hluah hluahte pawh kan nei. Ka kal dawna ni leng maia ka hna buai avânga rilru tawt teuha ka awmdante ka ngaihtuah kir a. Hetia kan han nui ta hawk hawk hi a man a tam hle a, pawisain lei dawn ila engzat man tak ni ang mawt lawmna tlângah min hung chhuak chiang kher mai. Hei hi alawm, hlu kan tih thin chu ni.
Ka hun a lo thleng a, an la hmuh ngai miah lohin thu ka han sawi ve te chu an man chak êm êm mai a, fiamthu thiam rual, rilru chak chi hlir an ni bawk a, ka tlangnel phah hle. Hetiang khawvelah hian ipik taka ka awmna atangin ka rilru chu min thlâksak ta hlawk a ni ber mai a. Hei hi a ni, sawi hat tham commedian search leh mihringte inzawmna khawvel chu!
Talent ngah chungchuang, hla phuah thiam, zai thiam, tingtang perh thiam, hla thlûk siam thiam, hriatna zau tak nei Pu |hatea chuan hun a rawn khar ta. Hlauh ang ngeiin ka cho hmasa rawk a, min rawn paihthla nalh thei hle. Amah kâp a thu ka sawi lai, kan hlim a, kan nuih dar dar lai kha chuan, ka bula awmte khan nasa tak leh uar taka min nuihpui avângin ka lamtang vek an ni maiin ka hria a, ka hlim hle ka tih kha. A tawp khar nana min han vawm meuh chuan, ka chan a chhe ta hle a, ka hul a, sawi tur ka nei tawh lo. Programme a zo a, kan bâng zui a, chibaitu pawh ka nei ta lo! Amah T Lalengzauva’n, “Ka thlarau nun hlima a lawmlai chuanin, Hmangaihtu an tam chhiarsen rual an ni lo. Mahse sual thim zingah chauvin ka rum, Thlamuantu rêng ka hmu zo ta lo,” a tihte chu ka inchan dawn dawn ta mai a.
Unau hmel hai a hun a, chu kan nuihna in sira thing zara zan riah tum sava te chuan an thla khawngin an thlâwk kawi ziai ziai a, hnuai lamah nungchate an hram chiah chiah a, thereng nen lam aw rawl an chhuah a. Chung lamah khua a thiang vûk a, fiah takin thla chu a êng a. Muallungthu ram dai ruih leh chuta hlima nui dar darte chu, hmar lam atanga thlifim lo thaw chuan duhsak takin min chhem heuh heuh a. Van lam ka hawi chho a, leilung mawi taka siam a, nungchate min petu van Pathian chu ka fak a ni. Heng kan hun hman zawng zawng hi a hlu hlein ka hria. Hlima nui thin kalkhawm kan ni bawk a, hah a dam sawng sawng nia mawle. Commedian Search zet zawng, a khuhhawnna ringawt pawh buaipui tham, hlimpui tham a tling e.