Damlo 31,263 inentirna senso cheng vbch 42 chuang

Damlo 31,263 inentirna senso cheng vbch 42 chuang
Health & family welfare minister Lalrinpuii chuan MSHCS (Mizoram State Healthcare Society) official website – mshcs.mizoram.gov.in chu mipuite hman theih turin nimin khan SAD Conference Hall – II, MINECO-ah a tlangzarh.
Lalrinpuii chuan MUHCS chu hlawhtling taka kalpui a nih zel thu leh chhawr tangkai tam tak an awm tawh thu a sawi a, a hlawhtlin theih nana theihtawp chhuahtute hnenah lawmthu a sawi bawk. Cashless system hman a nih avangin chhungkaw tam tak phurrit a chhawk thu leh he scheme zawmtu, empanelled hospital pawh an awm ve nual tawh thu a sawi a. Chumi a nih avang chuan mipuite leh sawrkar hnathawkte pawh empanelled hospital-ah zel in admit turin a chah a ni.
MUHCS hnuaiah hian State pawna inenkawl turte tan Medical Board paltlang tul tawh mah se, refer kawngah harsatna a awm dawn loh thu leh thil mumal taka kalpui duhna vang zawk a nih thu a sawi a. Emergency Case-ah phei chuan awlsam taka kalpui a nih theih dan tur ngaihtuah zel a nih tur thu a sawi bawk.
Dr Lalhriatzuali Ralte chuan April ni 1, 2025 atanga tun thlenga MUHCS dinhmun tarlangin Mizoram chhungah Empanelled Private Hospital 11 leh Private Day Care Centres pathum an awm thu a tarlang a. Mizoram pawnah Empanelled Hospital 25 awmin, Deemed Empanelled Hospital 13 an awm bawk.
MUHCS hnuaiah hian Mizoram chhung hospital-ah mi 30,565 te inentirna man tumsak tawh niin Mizoram pawnah mi 698 te inentirna man tumsak tawh a ni a. Heng mi 31,263 te inentirna man atana MUHCS in a tumsak tawh zat hi a vai belhkhawmin Rs. 42,06,73,812 a ni.