Dampa-ah inthlan thawm ring

Dampa bial by-election lo awm turah campaign boruakin a vawrtawp a thleng mek a, campaign hun a tawp hnaih avangin political party-te a hma aiin an tang mek.
Dampa bialah hian a tir atangin inthlan thawm a ring a, kar hmasa lam atangin a ring zual niin a lang. Tun karah pawh a ring a, political party te’n a khar nana theihtawp chhuah an tum hlawm.
Thawhtanni atang khan ZPM-in hmun hrang hrangah street campaign an nei a, Aizawl atangin an mi pawimawhte an tel. MNF-in campaign khar nan mipui huapin khaw hrang hrangah hun an hmang mek bawk. Congress party pawhin khaw hrang hrang an tuam a, BJP pawhin hmun hrang hrangah hun an hmang mek.
Dampa bial atanga thu dawn danin, by-election ni mah se 2023 inthlanpui aiin campaign thawm a ring zawk a, inthlang boruak a nung zawk.
Political party-te pawh a hma aiin an tang emaw tih tur a ni a, party tin tan mahni party hmakhua a hril theihna a awm theuh avangin an tang nia ngaih a ni.
Ruai a lar a, khaw hrang hrangah vawk an talh sup sup a ni ber. Mizo khuaah pawh vawk an talh a, Tuikuk leh Chakma khuaah an uar lehzual nia hriat a ni.
Flag an zar sup sup a, khaw hrang hrangah party-te campaign office a lun thei hle. Street campaign leh vantlang inkhawm a lar a, candidate-te leh Aizawl atanga kal party hruaitute’n thu an sawi thin.
Dampa bial atanga thu dawn danin, tun tum inthlanah hian an inseng nasa tih a lang reng a, ruai siam an uar bakah street campaign leh vantlang inkhawm chi dang an uar a, zaithiam lar an sawm thin avang te, thil danga an insennate nena chhutin, sum senso a tam ang tih a lang reng. Khaw pakhatah phei chuan MNF leh ZPM-in link road an lai ve ve.
Candidate leh an campaigner-te’n kawng siam an tiam vek a, kawng chungchang hi inthlan au hla a tling. Dampa bial mite sawi danin, ZPM candidate-in kawng chungchang a aupui bakah state-a sorkarna changtu party an nih a zuar ber a, zirna leh hriselna lam a sawi bawk. MNF candidate-in kawng chungchang a sawi a, zirna leh hriselna lam te, ni 100 inhlawhna tha zawka kalpui te, bialtu MLA (thin) Lalrintluanga Sailo hmalakna bawhzui leh hmunphiah hralhna chungchang te a aupui. Congress candidate-in kawng siam a aupui a, lei dawh/siamthat a aupui bawk. BJP candidate-in India rama sorkarna changtu party an nih a aupui a, ambulance pek te, thalaite tana thawh te, zirna chungchang te a aupui. BJP hian Dampa leh Delhi thlun zawm an tiam a ni.
Dampa bial mipuite hian November ni 22-ah vote an thlak dawn a, November ni 9 tlai dar 4-ah campaign hun a tawp ang. Campaign hun a tawp hnaih avang hian party-te leh candidate-te tan zual hun a ni mek.