Dampa bial by election atan November 11 ruat

Dampa bial MLA by election neih hun atan November 11 a ruat a, November 14-ah vote chhiar a ni ang. Election Commission of India (ECI) chuan Thawhtanni tlai khan tunhnaia India rama inthlan hmachhawn tur hrang hrangte atana ruahmanna siam dan a puang a. Mizoram-a Dampa Assembly constituency-a by election hun tur pawh a tel. ECI thupuan hi chief electoral officer (CEO) Mizoram Dr Lalrozama chuan Thawhtanni tlai vek khan a kimchangin a puang chhuak ve leh a ni.
Inthlan neih a nih tur thu hi ECI chuan kumin October 13 khan a lo tichhuak tawh a. Candidate nih tum tan October 21 thleng hming pek luh theih a ni a, October 22-ah nomination paper endik a ni ang. Inhnukdawk leh duh tan October 24 thleng hun hawn a ni.
November 11-ah vote thlak a ni anga, November 14-ah vote tla hi chhiar a ni ang. Inthlan hun leh vote chhiar hun hi tunhnaia state danga inthlang turte nen a inrual vek a. November 16 hmaa inthlan kaihhnawih hi tifel vek turin ECI chuan a ti a ni.
CEO Mizoram chuan Mizoram People Forum leh tlawmngai pawl dangten inthlan muanawm leh felfai neih kawnga theihtawp an chhuah thin chu fakawm a tih thu a sawi a. Model code of conduct chu inthlan puan rual hian hman tan nghal a ni tih a sawi.
2-Dampa(ST) Assembly constituency by election-a hman atan electoral roll tharah voter 20790 an awm a, draft roll aiin vote nei thar 385-in an pung. Vote nei zingah mipa 10605 leh hmeichhia 10185 an ni a, service voter 115 an awm.
Polling station 41 a awm a, Silsury-I P/S ah voter 1103 awmin an tam ber a, voter tlemna ber chu Zopui P/S niin, voter 30 an awm. Zopui hi lirthei a luh loh avangin kea pan ngai a ni a, power supply a la lut lo bawk.
Hmeichhia bik vote thlakna tur Pink Polling Station pahnih a awm dawn a; Critical Polling Station pathum – Silsury-I, Silsury-II & Silsury-III a awm. Heng polling station pathum hi Central Armed Police Force-in an veng dawn a ni.
Critical polling station a awm chhan hi, international border-a awm an nih bakah ramri hung hna zawh a la nih loh avangte, dan phal loh ralthuam leh thildang tam man a awm thin avang leh, Mamit district hmunpui Mamit atanga polling station hla ber an nih avangte, police station hnai ber Marpara PS pawh km.50 a hla niin, harsatna thlen palh thulhah kawng a chhiat avangin a chingfel tur tan a panna darkar 2-3 hun hman a ngaih avangin critical polling station-a puan an nih phah tih Election hotute chuan an sawi.
Tun thlengin political party 4-in official candidate an siam tawh a. Rorel lai ZPM-in Vanlalsailova, MNF-in Dr R Lalthangliana, INC-in John Rotluangliana, BJP-in Lalhmingthanga an ni a; party dang emaw independent emawa din tum thawm hriat a la ni rih lo.