Dampa bial by election MNF candidate Dr R Lalthangliana

Dampa bial by election MNF
candidate Dr R Lalthangliana
Chatuan ram pan ta Lalrintluanga Sailo bial kalsan tak Dampa biala MLA by election neih turah MNF party chuan an official candidate atan an senior vice president Dr R Lalthangliana an ruat.
Nilaini khan Mizo Hnam Runah MNF president Zoramthanga chuan an candidate tur hi a puang a. Opposition nih laia by election-a din chu thil hautak tak a ni, tiin, kum hnih pawh la sawrkar lo candidate khing tura kal chu thil phurawm loh tak a nih bakah MNF MLA Pu Lalrintluanga Sailo bial ruaka ding tur ruat a ngai ta chu a lungchhiatthlak tel tih a sawi.
“Pu Lalrintluanga’n Dampa bial hmasawnna hna a lo thawh mek leh hmachhawp chhunzawm turin kan senior vice president a din a tulin kan hre ta a. Inthlan result chhuah hma leh inthlan hma hauh pawhin Dampa bial mipui an vannei hle a ni,” a ti.
He by election neih turah ruling party-in candidate an puang hma hle a, House-in sunna a neih pawh an nghak hman lo chu mak a tih thu Zoramthanga hian a sawi. Dampa bial chu ZPM thlipui tleh tak tak laia MNF tlinna bial a ni a, tunah a hma ang khan an thlipui a tleh tawh si lo tih a sawi a ni.
MNF candidate Dr R Lalthangliana chuan, politics-a a danglam bikna chu, an hotute thu a hnial ngai loa, nationalism nunpuitute sawmna chu hnar thei niin a inhre lo a, engmah chhuan tur a neilo a, an mittui tla hruk hulsak turin Dampa bial mipui a sawm tih a sawi.
“MNF leh MNF ni lemlote hnenah ka sawi duh chu, Pu Rintluanga sulhnu la zawh fel si loh chhunzawmin Bangladesh nen border trade lama hmalak tawhna hi chhunzawm tur kan ngah hle a, chumi ti thei tur chuan bial mipui khawngaih vote ka ngen a ni,” a ti.
Lalrintluanga Sailo MLA (L) nupui Lalbiakthuami pawhin a pasalin Dampa bial chu bial himah siamin an enkawl reng dawn tih a sawi a. Dr R Lalthangliana tling ngei turin an chhungkua chuan duhsakna an hlan a, theihtawp an chhuah dawn tih a sawi a ni.