Dampa bial bye election leh a behbawm….

Dampa bial bye election neih tura political party pali official candidate-te chuan returning officer hnenah nomination paper an theh lut ta a; heng party-te hi ZPM, MNF, Congress leh BJP te an ni. Vawiin hian PC party official candidate tur chuan nomination paper a thehlut dawn bawk nia hriat a ni a, candidate hi panga an awm dawn ta niawm tak a ni.
Bye election hnuhnung ber Serchhip bialah khan political party official candidate 5 leh independent pakhat, a vaiin candidate paruk an awm a, bye election-a candidate tamna ber a ni pha hial mai awm e.
Serchhip leh Dampa bye election hian inanna leh inan lohna an nei a. An inanna chu bialtu MLA te opposition ve ve an ni. An inan lohna chu, Serchhip bye election kha bialtu MLA disqualified vang a ni a, Dampa erawh thihna avangin.
Serchhip bye election-ah khan a hmaa bialtu MLA ngai (Opposition) chu hneh taka thlan tlin leh a ni a. Dampa bial bye election-ah hian Opposition (MNF) hian hnehna an chang zui ve dawn em tih chu mipuiin dingdihlipa an thlir mek a ni ta a ni.
Tun tum bye election result hian political party-te hma lam hun thui tak a hril thei dawn niin a lang. Lo tawn hriat tawh atanga chhut chuan, Serchhip-ah khan opposition MLA bialah opposition lam an chak leh a, a hnu lama genereal election-ah hneh takin sawrkarna an chang zui a.
Dampa bial bye election-ah hian a bial neitu Opposition lam hi an chak ve chuan, general election 2027 lo awm turah beiseina a sang zual sawt bawk dawn tihna a ni.
Hetih rual hian, political party dangte tan pawh, tun tum bye election result hi dinhmun inhriatchianna atana pawimawh tak a ni dawn a. Tun dinhmuna palian pahnih ZPM leh MNF inkarah hian, tunhmaa palian thin (Cong) hi a rawn thuchhuak leh mek niin a lang a, BJP ni se, chhantu nei hrawl tak, central sawrkar zem zen a lo ni bawk nen, tun tum bye election result hi political party tin tan hian a pawimawh dawn hle a ni.
Bye election-ah hian Ruling tan chance a tha tih ni thin mah se, ‘chance tha’ ringawt hi tlin phahna a ni lo tih chu Serchhip bye election khan a rawn nemnghet a. Tuna Dampa-ah hian ‘chance tha’ hi a lo tha ziktluak reng em tih chu finfiah a ni leh dawn ta a ni ber e.