Dampa bialah voter 20405 awm

Dampa bialah voter 20405 awm
Dampa Assembly constituency draft electoral roll-ah vote nei 20405 an awm a, polling station 41 an awm.
Thawhlehni khan Dampa bial draft electoral roll hi Mamit district election officer, bawrhsap K Laltlawmlova’n a tlangzarh a. Dampa bial by election neih turah electoral roll-a chuang tur chuang lo, thi tawh hming paih ngai awm leh hmundanga pem/ vote nei tawh pawh inenfelna hun hawn chhungin ngaihven tha turin bial mipui a chah.
2-Dampa (ST) AC huamchhungah hian polling station 41 a awm a; voters 20405 awmin, mipa 10425 leh hmeichhia 9980 an ni. Sex ratio hi 957 a ni. Dampa biala voter tlemna ber chu Zopui Polling Station niin voter 38 an awm a, Silsury Polling Station niin voter 1089 an awm. Service voter 115 an awm bawk.
Draft roll tlangzarh takah hian hming thunluh ngai, paih ngai leh siamthat ngai tan September 2-17 chhung hawn a ni a. Dilna lut hi ERO/AERO ten enfiahin, September 25 hmaa chinfel hman tur a ni. September 30-ah final electoral roll tlangzarh a ni ang.
Dampa bial by election atana Special Summary Revision of Photo Electoral Roll 2025 hi buaipui mek a ni.
Thawhlehni vek khan Dampa biala booth level officer (BLO) te tan training neih a ni a. Polling station 41 awmah polling station tinah BLO pakhat zel an awm a ni.
Dampa bial by election neih turah bial mipui tana EVM hmanga vote thlak dan zirna hmun ‘EVM Demonstration Center’ chu West Phaileng BDO office-ah leh Reiek BDO office-ah vawiin – September 3 atangin siam a ni dawn a. A duh apiangin EVM hmanga vote thlak dan leh VVPAT-a vote tlak dan belhchian theih a ni anga, hriatthiamloh an neih chuan zawhfiah theih a ni ang.