Dampa Tiger Reserve vengtute Hlawh lak loh rei vangin nuar

Thla ruk chhung hlawh la tawh lo Dampa Tiger Reserve vengtute chu hlawh lak ngiatin an nuar mek a. Inhlawhna dang zawngin an hna an chawlhsan rih.
Dampa Tiger Reserve & Sanctuary vengtu Tiger Protection Force (TPF) Association hian kumin February khan an hotute hnenah ziaka thlenin, an hlawh tang a thla kima an lak har avang leh fieldgear an dawn tur ang an dawn loh avangin harsatna an tawh phah nasa tih an sawi a. February thla ralhmaa an lak loh chuan March thla atangin duty tura chhuak tawh rih loin, an nitin mamawh ngaihtuahin inhlawhna an zawn mai tur thu an sawi a. An harsatna hriatthiam pui a, an hlawh lak loh chin zawng thla kima an lak theihna’n hma lakpui turin an ngen a ni.
The Aizawl Post-in a zawhchiannaah TPF Association hruaitute chuan hlawh hi nikum September atangin an la lo a, fieldgear pawh hi an dawn lohna a rei tawh a, a bikin a field-a an duty-naa an mamawh tak takte chu tun kum 2/3 kalta chhung khan khingbai tak takin an dawn chauh thin thu an sawi. An ni hriat dan chuan, an hlawh tur hi sawrkar laipui atanga lokal tur ang chu a rawn kal tawh a, state sawrkarin a tum ve tur chu hmuh ala ni lo. An hlawh tur hi centre leh state-in a intum sem a ni.
An association ah hian member 160-170 vel an awm a, Tiger Reserve chhunga duty bakah Aizawl leh W Phaileng-ah office lama thawktu an awm bawk.
An thil ngiat chungchangah hian kumin February 14 khan Dampa Tiger Reserve field director chuan ziakin sawrkar lam harsatna tawh a hrilhfiah ve thung a. National Tiger Conservation Authority (NTCA) lam chuan kum 2022- 2023 chhunga an sum pek tur hi peih sa diamin an kawl tawh a. Pekchhuah an hmanhmawh avangin a khat tawkin state sawrkar lam pawh an rawn hrilh reng zawk a. Amaherawhchu, kumhlui lama sum hman zawh loh tlem ala awm avangin an la pechhuak thei lo mai chauh niin a sawi.
Kumhlui sum la pekchhuah loh an tih hi, Tiger Protection Force uniform leh fieldgear leina tur a ni a. Kumin January khan DPAB approval an hmuh theih chauh avangin expenditure sanction tura an dilna hi a thang mek a. Chumi a fel hunah sum hi hman theih chauh a ni dawn. Hei hi hman zawh a nih a, PFMS portal-ah zero balance a nih veleh NTCA-in kumthar sum an rawn pechhuak ve nghal dawn, tiin a sawi a ni.
Field director-in ziaka sawrkar lam harsatna a hriattir bak hi chu, an nawrh hma leh nawrh hnu ah tawngka leh ziak pawhin sawrkar lam atangin thuthar dawn an la nei lo tih an sawi a ni.
TPF Association chuan nikum hmasa lam pawh khan rei tak chhung hlawh lak loh avangin an lo nuar tawh tih an sawi a. Tumdangah chuan sawrkar kumthar intan chhoh laia hlawh lak loh rei hi chu an nei thin a, a bak chu hunbi pangngaiah a lo lut ve mai thin tih an sawi.
Dampa Tiger Reserve chhungah hian ramsa hmuh tur tawng fo lem lo mah se, an hnu erawh hmuh tur a awm reng a; ramsial, sazuk leh sa dang hnuhma pawh a awm reng tih an sawi. Chutihlaiin, ramsa leh ramhmul lam zawnga he ram huamchhunga lut ru hi an awm thin a, a then phei chu an ni ai maha ram chin hria an nih avangin, inman leh inumchhuah tum awm mah se, an hriat lem loh chang a awm fo tih an sawi. Thawktu hi an tam viau lo naa, indaih lo lutuk chu an ni loa, ramchhunga kar khat vel an inriahchhawk hnu ah, kar khat vel chu an awl ve thei thin tih an sawi a ni.