Damrei i duh chuan chhiar tam rawh!

Damrei i duh chuan chhiar tam rawh!
Mithiam ten zirchianna an neih thar atanga an hmuh danin lehkhabu chhiar thin te chu lehkhabu chhiar ve ngai lo te aiin an damrei zawk an ti tlat mai. Yale University, US-a mithiam ten kum 50 chunglam mi 3,635 te data zirchiangin, lehkhabu chhiar nasa te chu a chhiar ve ngai lo te aiin an damrei zawk tih an hmuchhuak ta niin an sawi.
He zirchiannaa participant-te hi group thumah then an ni a, lehkhabu chhiar ngai lo, kar khatah lehkha chhiar nana darkar thum leh a chanve vel hmang thin leh kar khata darkar thum leh a chanve aia tam chhiar thin group-ah te then an ni.
He zirchianna atanga an hmuh danin mipa aiin hmeichhiain lehkhabu an chhiar nasa zawk a, college rap pha chin leh a, eizawnna lama hlawh sang deuh hoin an chhiar nasa leh deuh bawk.
Zirchianna neitute chuan an kum zat, eng hnam nge an nih, an hriselna, depression an neih leh neih loh, an eizawnna leh nupui/pasal an neih leh neih loh thlengin an ngaihven a, chuta tanga an hmuh dan chuan kar khata lehkhabu darkar thum leh a chanve chhiar thin te chu a chhiar ve ngai lo te aiin zirchianna an neih atanga kum 12 chhunga thih theihna risk 17%-in an nei tlem zawk a, kar khata darkar thum leh a chanve aia rei chhiar thin te chuan a chhiar ve ngai lo te aiin an thih theihna risk 23%-in a hniam zawk niin an sawi.
Zirchianna neitute chuan lehkhabu bakah chanchinbu leh hunbi neia chhuak chanchinbu chiar te pawh an zir tel a, mahse, lehkhabu chhiar ang em chuan thih theihna risk chungchangah nghawng a nei lian lo zawk niin an sawi.
He zirchianna chungchang hi journal Social Science and Medicine-ah tarlan a ni.