Dan ennawn tur Committee thukhawm

Dan ennawn tur Committee thukhawm
Mizo Inneih, Inthen leh Rokhawmna Dan ennawntu, Review Committee chu an chairman, Law & Judicial addl. secretary Zamingthanga Ralte hoin Thawhlehni khan a vawikhatna atan an thukhawm.
The Mizo Marriage, Divorce and Inheritance of Property Act 2014 hi Law Commission kutchhuak niin Mizoram Legislative Assembly chuan kum 2014 khan lungrual takin a pass a; 2015 February 13 atanga hman tan a ni. He dan hman a nih atang hi chuan, Mizo Customary Law tih thin kha hman a rem tawh lo a. Kum 10 dawn hman a nih hnu hian siamthat ngai, belh leh paih ngai a awm a. Mimal leh pawl engemawzat atanga rawtna lut enfel turin Mizoram sawrkar chuan Review Committee hi kumin September 11 khan a din a, an report hi kum khat chhunga thehlut tura tih an ni.
Chairman chuan Mizoram kohhran hrang hrangten inneih an buatsaihin he dan hi an an hmang ngei a ni, tih tihlanna atan inneih certificate-ah an tarlang ngei tur a ni, tih a sawi a. He dan tlawhchhan loa inneih chu he dan-in hamthatna hrang hrang a ken tel an chang ve thei dawn lo tih a sawi a ni. Hei vang hian he dan la hmang ve lo kohhran an awm chuan hman thuai a tul tih a sawi a ni.
Hetih rual hian, kohhran hrang hrangin inneih sawngbawl leh inkaihhruaina an neih nekbuai lo zawnga he dan hi siam a ni a, chu chu sawrkar duhdan reng a ni tih a sawi bawk.
Thutkhawmah hian Mizoram Kohhran Hruaitute Committee aiawh, Central YMA, MHIP, MUP leh State Women Commission aiawh bakah mithiam sawm bik engemawzat an tel.