Dan hnuaia electronic bungrua thehthang a tul chhan inhrilhfiah

Mizoram Pollution Control Board (MPCB) leh Hulladek Recycling Company buatsaihin elecrtronic bungrua hluihlawn tawh awmze nei zawka thehthang dan tur inhrilhna chu Thawhtanni khan Aizawlah neih a ni.
He workshop hmanpuitu MPCB chairman Liankima Lailung chuan electronic bungraw chhia (e-waste) chu phalna neite (e-waste collector) hnenah chauh thehthang tur a ni, tiin, phalna pe theitu chu State Pollution Control Board a ni tih a sawi. Collector-te hian store/stock chiah an ti thei a, an thiat darhin an phelh darh thiang lo a. E-waste aia hlauhawm bawlhhlawh dang a awm lo awm tel theih avangin a hranin dan pawh siam a ni hial reng tih a sawi a ni.
Hulladek Recycling Company leh MPCB atangin powerpoint presentation an pe a. e-Waste Management Rules pawimawhna leh siam chhan, e-waste thehthang kawnga a hmangtu mipui mawhphurhna leh e-waste tih tlem dan leh tih tlem pawimawhna zir ho a ni.
Workshop-in a tum ber chu, dan zawmin engtin nge kan electronic bungraw chhia kan thehthang ang tih a ni a. Bawlhhlawh dang zinga paih ve a thian loh chhan chu, chhiatna nasa zawk thlen thei thil a awm avang leh environment vawn thianghlim zel nan, company-a thawnleta recycle theih thil a nih vangin e-waste khawnkhawm tura SPCB phalna pekte kutah chauh pek tur a ni tih sawi a ni.
Hulladek Recycling Company hi Mizorama electronic bungraw chhiate khawn khawma dan dik taka a tul anga thehthangtute an ni a, an ni hnenah hian e-waste pe-in an tiral thei a ni.
Workshop-ah hian sawrkar department hotute leh zirlaite, electronic bungraw kaihhnawih zuar leh repair thinte an tel a ni.