Dan lova India-a lut Bangladeshi 16 thawn haw

Dan lova India-a lut Bangladeshi 16 thawn haw
Ahmedabad Police Crime Branch chuan Bangladesh atanga India-a dan lova pem lut mi 16 an thawn haw a, March thla tawpa mi dang 36 thawn haw leh turin an inbuatsaih mek tih police hotuin Nilaini khan a sawi.
July, 2024 atang khan Gujarat-ah hian Bangladeshi nia hriat naupang pahnih telin mi 52 an man tawh a. Special branch chu external affairs leh Bangladesh high commission nen thawkhovin thawn haw leh dan an dap zel a ni.
“Bangladeshi mite an ni tih finfiah a nih hnuah thuneituten thawn haw dan tur an buaipui zui thin a. A hmasa ber atan 16 chu February 1 khan thawn haw niin an zingah hian kumtlinglo pakhat a tel a ni,” tiin Crime Branch Assistant Commissioner of Police (ACP) Bharat Patel chuan a sawi.
Kumtlinglo pakhat telin mi dang 36-te pawh Sardar Nagar-a detention centre-ah an la awm a, March thlaah chuan an thawn haw leh hman an inbeisei tih Patel chuan a sawi bawk.
Heng mite hi Indian lehkha lem an hmang a, Aadhar card lemte pawh an nei a, hemi hmang hian India-ah an lut thin a. Thuneitute hian Bangladeshi hmeichhia leh naupang hralha sumdawnna kalpui thin an hai chhuak bawk tih an sawi.
“Thenkhat hi mihringa sumdawnnaa inhnamhnawih leh hna thawh luihtir te, an agnet-ten nasa taka an chhawrte an ni a. Pawisa an hmuh angte chu Bangladesh-ah thawn thin a ni a. Hetianga dan lova India lutte hi a tlangpuiin hna hniam deuh thawk leh khawlaia ei leh in zuar an ni tlangpui,” a ti.
Thuneitute hian mihringa sumdawnna thil leh sum vel an inpek kualna an la chhui zui zel bawk a. “Central agency-ten dan pela sum leh pai vir vel thil leh a kal zel dan hi an chhui zui a ni,” tiin Patel-a chuan a sawi.