Dan lova thil laih chhuah bultumtu zawng

South Africa-a police-te chuan rangkachak khur hluihlawn tawh, dan lova lo tharthawh leha a chhunga ruang 78 zet kar hmasaa an hmuh chhuahna hmun lo tinung lehtu ber nia an hriat chu an zawng mek.
Police chuan thuneitu tuten emaw Tiger tia an hriat, James Neo Tshoaeli-a hi Stilfontein-a thil laih chhuahna hmun atanga lak chhuah a nih hnuah a bik bo theih nan an pui niin an sawi a. Amah hi Lesotho ram mi a ni.
Khur hi thla eng emaw zat liam tawha police-in an khar hnuah a chhungah hian lo lutin hma an lo la leh a, police chuan damin alaitu mi 240 chuang an la chhuak.
Officer-te hian a chhunga awmte hi an lo chhuah mai theih nan tui leh ei tur an lak luhna chu an dangchat hmasa vek a ni.
An lak chhuah thenkhat chuan Tshoaeli-a hi lei hnuaia an awm laia ‘thihna, kut inthlakna leh insawisakna’ thlenga mawhphurtuah an puh tih Thawhtannia police thuchhuahah tar lan a ni.
Tshoaeli-a hian an ei turte chu thil lai chhuaktu dang hnen atangin a la thin a, lak chhuah an nih hian an chak lo hle a, enkawl zui nghal ngaiin an awm hlawm.
Police commissioner Patrick Asaneng chuan Tshoaeli-a a tlan bo theih nana puitute chu an hre chhuak a nih chuan ‘hremna na tak’ an tawrh ngei tur thu a sawi niin police thuchhuahah tar lan a ni.
South African channel Newzroom Afrika-a a inlannaah police thupuangtu, Athlenda Mathe chuan officer-te hi an hrilh a haiin pawi an ti hle tih a sawi.
Mathe-i hian a tlan bo theih dan hi an chhui mek tih a sawi a, police pawh anmahni leh anmahni an inchhui mek tih a sawi.
Stilfontein-a thil laih chhuahna khura ei leh in tur an lak luhna hi thla chuang danchah a nih hnuah kar hmasa khan court chuan sorkar hnenah hian chhanchhuah hna thawk turin thu a pe.
Ningani khan chhanchhuah hna hi thawh zawh a ni a, Mathe-i chuan ruang an hmuh 78-te hi tute nge an nih tih hriat chu hna hautak tak a ni dawn tih a sawi a. Tam tam chu lehkha leh an nihna tichiang thei nei lo an nih hlawm vang niin a sawi.
Heng thil lai chhuaktute hi nikum November-a police-in ram puma thil laih chhuahna hmun hlauhawm zual a khar atang khan khur chhungah hian an tawm tawh.
Dan lova thil lai chhuaktu, ‘zama zamas’ (Zulu tawnga ‘vanneihna zawng’ tihna) sang telin leilung hausa tak, South Africa-ah hian a rukin beihpui an thlak reng a ni.
Stilfontein thil laih chhuahna khur hi Johannesburg khawpui chhimthlang lam km 145 vela hlaa awm a ni a, he khura ruang leh nung damte chu lak chhuah vek an ni tawh tih police chuan an sawi.
Sumdawng pawl leh mihring dikna chanvo humhalhtu pawlte chuan thuneitute hian ‘mi an suat’ niin an puh.
Police erawh chuan an hmalakna hi tul an tih thu an sawi a. Hetianga dan lova thil tih hian thil laih chhuah sumdawnna kal pangngai a tibuai a, mihring tuartu an tam zawk niin an sawi.