Dan lovin taxi chuan man

axi chuan man chungchangah ‘Mizotaxi’ app hman tum a ni a, hemi atan hian in-register a ngai. Chumi chungchang chu tunlai titi pakhat a tling a, duh leh duh loh chungchangin sawi a hlawh mek. He thil hi dan hmanga tih a ni em tih pawh sawi tham a tling ang.Mizotaxi’ app hi Aizawlah July ni 1-a hman tan tur a ni a, 4-wheeler taxi, 2-wheeler taxi leh autorickshaw-te chu June thla chhunga registration tifel vek tura ngen leh hriattir an ni tih May ni 29 khan sorkar thuchhuahah a lang. Taxi neitute’n hei hi an duh lo a, State Transport Authority (STA) nen an indawr zui a ni.
May ni 29-a sorkar thuchhuahah chuan “June 2026 chhunga in register te tan registration fee hi kum khatah Rs 600/- only (Rs.50/month) a ni ang a, hemi hnu lama in-register te chu Rs 1000/- an pek a ngai tawh ang,” tih a ni.
Sorkar hmalakna reng reng dan tlawhchhan neia tih thin a ni a, sikul chawlh pawh dan tlawhchhan neia puan a ni. Mizo taxi app hman tur tih chungchangah hian dan tlawhchhan tarlan a ni lo.
“Sorkarin thil a tih dawnin dan hmanga tih zel a ngai a, tute emaw tha tih dana tih zel mai a nih chuan sorkar a awm lo tihna tluk a ni thei ang. Mipui nghawng thil reng reng chu dan hmanga tih tur a ni a, tuna Mizotaxi app chungchangah hian eng dan nge an hman tih hi sawi tur a awm lo a. Hei hi state tan a him lo,” tiin sorkar official lian tak ni thin, pension tawh, a hming tarlan rem lo chuan a sawi.
Sorkara sum lut tur thil tih a nihin dan hmanga tih a ngai a, chhiah chi thar lak a nih dawnin council of ministers/cabinet a paltlang a ngaih bakah legislative assembly-ah an pass thin. Sorkara sum luhna tur Mizotaxi app hman chungchang hi council of ministers emaw cabinet emawin thil rel a ni lo a, legislative assembly dan siam a ni hek lo.
‘STA-in tha an tih angin sum an la thei a nih chuan department dang pawhin sum an khawn thei fur ang a, chhiah an la sup sup thei ang,’ tih ngaihdan a awm.
Lirthei chungchanga sum (fee) lak theihna hi danah a inziak sa vek a, STA hi MV Act Section 68 hmanga din niin, MV Rules-ah chuan chapter V-ah sum lak theihna tur thil hrang hrang 16 a awm; chutah chuan app leh hetiang lam hawi hi a awm lo. MV Rules-ah hian STA thuneihna (power of STA) pawh ziah lan a ni a, taxi app chungchang a lang lo.
June ni 8-ah khan Mizoram Taxi Association, Aizawl Two Wheeler Taxi Association, Aizawl District Auto Rickshaw Owners Association hruaitute’n transport minister leh STA secretary te an hmu a, registration fee kum tin Rs 1000 chawi ngai tura tih chu paih tur tia inrem bakah registration fee RS 600 tur pawh Rs 500-ah tihhniam niin, late fee thai bo ni se an ti bawk. Hetia indawrnaa tihdanglam mai theih a ni hian dan a awm lohzia a tarlang tih chu chinchang hriate ngaihdan a ni.