Dan zawm hi kan thatpui zel….

Tun hnai khan Ramthar Venga LPG sem chhuah chu mipuiin an buk a, buk tling lo a tam hle a, thuneitute hnenah report niin Legal Metrology lamin an buaipui zui a, gas buk tling lote hi man (seized) niin gas company hmunpui lamah report nghal a ni a.
LPG sem tura phurh chhuah hi bur 120 (Pikup trip 2) niin, heng zinga bur 92 chu buk tling lo a ni. Chumi awmzia chu, gas bur za zela 76.6 (76.6%) chu buk tling lo tihna a ni.
Ramthar veng mipui zingah hian, an gas hman lai chu ni dang aia a zawh hma thu sawitu an tam tak em avangin, tun hnaiah hian gas semna point-ah gas cylinder-te hi an buk ta niin khawtlang hruaitu pakhat chuan The Aizawl Post a hrilh a; a hma chuan gas hi an buk ngai bik lo niin a sawi bawk.
Gas buk tling lo kan buaipuina hi a rei ngar ngar ta hle a, YMA pawhin an hahpui a, legal metrology lam pawhin an hahpui bawk. Kawngpui dungah tlaivar thak thakin an duty a, gas tichingpen lai pawh an man hnem narawh e, mahse, a reh thei lo chu a ni ber.
Gas kan lak dawn hian, a buk a tlin leh tlin loh hi consumer-te hian kan lo endik thiang a, endik theihna Dan pawh a awm thlap a, chu chu Legal Metrology lam hian zawm turin mipui hi min hrilh/fuih mawlh mawlh reng a, mahse mipui lam hian kan bengkhawn miau loh avangin gas phurtute hian chu chu an hre kar a ni ber e.
Thil man (rate) chungchangah pawh hian, MRP aia tova thil lei lo turin Legal Metrology leh Consumer’s Union hruaitute pawhin mipui hi min fuih nasa; MRP aia tova thil hralhtu chu report theih a nih thute pawh kan hre reng, mahse kan report/complain peih loh avangin mipui hian manto tak takin thil kan lei reng mai a ni.
Hetiang thilah hian, mipui hi kan harh thar a pawimawh hle. Danin kan dikna leh chanvo min humhalhsak hi kan hmang peih lo a nih chuan kan tuar reng mai dawn tihna a ni a. Mipui hi kan taimak a, Danin ti tura min phut anga kan tih peih hun hunah kan zalenin nuam pawh kan ti ang a, tawrhna, hreawmna leh buaina pawh kan pumpelh dawn tihna a ni.