Danglamna thlentu point 2 lek! Norris kutah F1 title lut ve ta nge nge
Danglamna thlentu point 2 lek!
Norris kutah F1 title lut ve ta nge nge
McLaren driver Lando Norris chuan Pathiannia Formula One world championship kharna Abu Dhabi Grand Prix-ah a mamawh tawk chiah result neiin, season tawp hnaih lama hlauhawm lutuka rawn arh chho Red Bull thiampuipa Max Verstappen-a um phak loh tawk chiahin a career-a a vawi khatna atan mittui nen F1 drivers’ title a hlawhchhuak ve ta nge nge.
Kum 26-a upa Norris hi Briton zinga F1 drivers’ championship hnehtu ni thei 11-na chiah niin, Pathianni season-ending Abu Dhabi Grand Prix-ah Dutch driver ropui Verstappen khan Arab tlankawngah hnehna chang leh mah se Brtitish driver Norris kha pathumnaah a thleng a, driver standing-ah point 423 hmuin, amah hnaihbertu Verstappen lakah point hnihin a sang hram a, a vawi khatna atan F1 champion a ni ve ta a ni.
Red Bull khalhtu Max Verstappen kha kumin grand prix-a vawi riat chak tling awmchhun niin, McLaren driver pahnih Norris leh a team-mate Oscar Piastri-te vawi sarih ve ve an chak a; kumina race hnehna chang ve dang awmchhun chu Mercedes driver George Russell niin, Briton hi vbawi hnih a chak tling.
Tarlan tawh angin, Pathianni Abu Dhabi Grand Prix-ah Max Verstappen a chak ber a; a hnung chiahah McLaren driver Oscar Piastri thlengin, Norris chuan lawmman semna dawhsan hniam ber luah chungin F1 khawvela a season sarih hmanna chiahah Formula One champion thar a ni.
Kumin hi kum 1998 hnu lama McLaren team-in drivers’ leh constructors’ title an lakkawp leh vawi khatna chiah a ni.