Darkar 24 chhunga burpee tihnem thei record siam

Georgia, USA-a personal trainer, Brian Reyelt, kum 45, chuan darkar 24 chhunga burpee vawi 11,988 tiin Guinness World Record, darkar 24 chhunga mipa zinga burpee tihnem thei ber recorda siam a, darkar khatah burpee vawi 499.5 vel zel ti ang a ni. A hmaa hetiang record siamtu chu Joe Reverdes, USA tho niin, 2022 khan darkar 24 chhunga burpee vawi 10,856 tiin record a siam a, hei hi Brian hian a rawn khum ta a ni. Brian hian record siam pahin Dana-Farber Cancer Institute tan dollar 22,000 a tuak ngah nghal bawk a ni.
Burpee hi exercise lak dan hahthlak zet mai niin, an ding ngil a, zuang chunga ke hnunglama thehin, push up ti tur position angin an bawk a, an awm lei siin an bawk leh a, chutah zuang tho lehin an ding ngil leh thin.
Brian hia nupui hnute cancer dam lehin record siam tur hian a chophur a, a nupui chuan thil rapthlak tak a tuar chhuak ni a sawi a, hemi pual hian Dana-Farber Cancer Institute tana sumtuakna nipahin record siam tum hian a bei ta a ni.
Brian hian record siam tuma a beihnaah a tir lamah rang taka burpee tiin, darkar khatah vawi 750 te a ti hman a, hetiang hian a hmasa lam darkar li chhung chu a ti theia, chutah a speed a muang ve ta telh telh a ni. A hun hmasa lam darkar li chhung hian darkar tinah minute 10 zel a chawl a, darkar 12 a tih hnuah phei chuan a taksa in-refresh turin a inbual zuai nghe nghe a ni.
Darkar 16-na vel tleng chuan harsatna lian tham a nei lo a, chumi pelh hnuah chuan a taksa a hah rimtawng tam a, a speed a muang ta telh telh a ni. Brian chuan hnute cancer research atana sumtuakna a nih mai bakah taksa hian rilruin a tlin bak thleng pawhin a ti thei tih lantir a duh ve hrim hrim niin a sawi a, “Kan rilru lamin a tawk tawh, i taksain a tlin tawh lo ang a tih hnuah pawh a let 20 vel kan la ti thei a ni,” a ti.
Brian hian mipa zinga darkar 25 chhunga burpee tihnem thei ber record siam mah se hmeichhe lamah phak loh pakhat a nei a, chu chu Australian nu in-fit zet mai Eva Clarke a ni a, Eva hian darkar 24 chhunga burpee vawi 12,003 ti theiin, 2015 khan record a siam a, a record hi vawiin thlengin khum lohin a la awm ta reng a, Brian chuan Eva record pawh hi khum a la tum leh mai thei niin a sawi.