Darkar 24 chhungin thing \iak 23,000 a phun hman

Darkar 24 chhungin thing tiak 23,000 a phun hman
Khawvel sik leh sa danglam nasa ta lutuk a vei a, ramngaw thiah nasat chuan khawvel boruak a tilum telh telh a, chu chu veiawm a ti a, thing tiak phun lamah tan a la ve ta a ni. Tlangval kum 24 mi, Antoine Moses, La Crete, Alberta, Canada a cheng chuan darkar 24 chhunga thing tiak 23,060 phun hmanin, Guinness World Record, darkar 24 chhunga mahnia thing tiak phun hnem ber record a siam. A hmaa hetiang record chu Canadian tho Kenny Chaplin-a’n 2001-a a siam niin, Kenny hian darkar 24 chhungin thing tiak 15,170 a phun a, he record hi Antoine hian a khum chiang hle a ni. Antoine hian Canada hmun hrang hrangah thing tiak maktaduai chuang a phun tawh niin a sawi bawk.
Antoine chuan, “He ka record siam hian mipakhat lek pawhin kan planet that turin nghawng nei thamin hna kan thawk thei tih a entir a ni,” a ti. Hetianga thing tiak phuna record siam tur hian kum 5 vel zet chu a inbuatsaih niin a sawi a, “World Record siam tura chetran dan hi kum 5 chhunga ka thil tawn atanga ka neih a ni,” a ti.