Darkar khata pushup tihnem record

Romanian infiammi, fit zek zawk tak mai Pop Laurentiu, kum 35, tuna London-a khawsa mek chuan kum ruk zet darkar khata pushup tihnem thei record siam tuma a lo inbuatsaih tawhna chu a puitlin a, record thar a siam ta. Pop hian darkar khatah pushup vawi 3,378 a tihman a, record thar a siam. A hmaa record siamtu chu Australian Daniel Scali niin, ani hian thla hmasa mai khan darkar khatah pushup vawi 3,249 tiin record a siam a, he record hi Pop hian a rawn khum ve leh ta a ni.
Pop Laurentiu hian 2017 atang khan pushup record hi siam tumin a lo bei tawh a, mahse, Guinness guideline a zawm tha tawk lo tiin a record siam tum hi an pawm sak lo a, tum ruk lai a record siam tum hi an lo hnawl sak tawh a ni. Pop chuan, “Ka thinlungah hi chuan ka thei tih ka hria. A hmasa lam vawi ruk ka tum ka hlawhchham hnuah kha chuan ka lunghnur ve khawp mai a, mahse, tunah chuan hnehna chang angah ka inngai ta,” a ti.
Pop chuan a hmaa an lo disqualify thinna chuan a tibeidawng chuang lo niin a sawi a, “Ka hlawhchham apiang khan tihnawn leh duhna ka thinlungah a lian telh telh a, chu chuan hmalam pan turin min nawr kal zawk a ni. Kan tluk apiangin kan tho leh a, chutiang hian kan tum ram kan hnaih hret hret thin a ni,” a ti.