David Rush-a’n Guinness World Record a siam leh ta

Idaho a cheng Guinness World Record siam lama mikhual lo tak David Rush chuan record thar a siam leh ta. Tun tuma a record siam chu minute khat chhunga juggling chunga grapes rah an vawrh ka a dawng hnem ber record a ni a, grapes 39 a kain a dawng hman.
David Rush hian nikum Guinness World Record 250 chuang a siam tawh a, kuminah 300 tlin hman ngei a tum a, a khat tawkin a record siam thu hriat tur a awm reng mai a, tun tuma a record siamah hian a thianpa, record a lo siampui fo tawh Jonathan ‘Hollywood’ Hannon nen bawk an inkawp leh a, a hmaa hetiang record pawh an pahniha an siam tho hi niin, chumi tum chuan grapes pum 35 a kain a dawng hman a ni.
Rush chuan he record siam tura an bei nawn leh chu tum dang aia phurawm a tih thu sawiin, “Ka record siam tawh hi ka khum leh fo a, mahse, tuna mi hi chu midangin an la khum miah loh a ni a, mahni record dinglai khum tuma bei kan ni a, a phurawm lehzual a ni,” a ti.
David Rush hian ball pathum a juggling char char a, chutihlai chuan Jonathan hian grape pum a mal te tein a lo vawr a, chu chu Rush hian a kain a lo dawng zel a, minute khatah grapes pum 39a dawng hman a, record thar an siam ta a ni.