Dawta inchirhthehna a lar thar – MNF Thalai
Dawta inchirhthehna a lar thar
– MNF Thalai
ZPM party pian hnua dawta inchirhthehna lar thar chuan Mizo khawtlang nun tichhia in, kohhran leh chhungkaw inrelbawlna thlengin a nghawng tih MNF Thalai chuan an sawi.
MNF Thalai Hqrs. vice president Zodinpuia chuan Mizo thalaite leh infiammite hmasawnna tura nasa taka thawk thintu Sports & Youth Services minister Robert Romawia Royte chu ZPM party-in kil hrang hrang atangin beihna tur an dap reng tih a sawi a. Social media-ah tawngkam chhe tinrenga chirhthehin, thu awmze neilo hmangin larsap-ah hial hekna an thehlut tih a sawi.
Assembly House-ah dawt a sawi avanga ZPM leader Pu Lalduhoma’n ngaihdam a dil tuk atangin ZPM hian kawng hrang hrangin Pu Robert Romawia Royte beihna tur hi an dap nia sawiin, Pu Lalduhoma’n ngaihdam a dil tukah Assembly House kawtah pungkhawmin, a tukah Vanapa Hall bulah an pungkhawm leh tih a sawi a. MLA atanga bang tura ZPM-in larsap hnena an thlen chu dan hremiten an zirchianna atangin, dan a bawhchhe loa, ZPM chuan politics-a mipui rilru hruaikawi nan thudiklo an vawrhkual mai mai tih mipuiin hria se an duh tih a sawi bawk.
MNF sawrkarah Sports minister hmalakna avanga kum 4 chhung leka Mizo infiammite hmasawnna an neihye MNF Thalai hruaitute chuan an sawi a. Sports chu industry status pek niin, infiammite tan sawrkar hna Group ‘B’ chin hnuailam 5% reserve a awm thu te; Mizoram Sports Incentive Cash Award Scheme 2022 siam thar a nih thu te; Olympic Games-a gold medal latu in cheng nuai 100, silver latu nuai 75, bronze latu nuai 50 an dawng tawh dawn a. Commonwealth Games/ Asian Games/Youth Olympic Games-a gold medal latu in nuai 25, silver medal-in nuai 15 leh bronze medal-in nuai 7.5 an dawng tawh dawn tih te an sawi.
ZPM MLA-ten kawng hrang hranga Pu Robert Romawia an beihna chu thudik lo a ni tih finfiah leh nghal zel a nih dante MNF Thalai vice president chuan sawiin, “ZPM a lo din ve hnu hian dawta inchirhthehna hi Mizoram politics-ah a lar thar ta viau a, hei hian Mizo khawtlang nun nuamtak tichhia in, kohhran leh chhungkaw inrelbawlna thlengin nghawng thalo a nei ang tih a hlauhawm hle,” a ti.