DAY-NULM Festival nei

Urban Development & Poverty Alleviation Department hnuaia scheme kalpui mek, Deendayal Antyodaya Yojana – National Urban Livelihoods Mission (DAY-NULM) hnuaia Aizawl City Mission Mangement Unit (CMMU) buatsaihin ni thum awh tur DAY-NULM Festival -cum- Street Food Festival chu Thawhlehni khan UD&PA director H Lianzela’n Aijal Club Park-ah a hawng.
DAY-NULM mission director ni bawk H Lianzela chuan district hrang hrangah hetiang hi thla kalta khan buatsaih a ni tawh tih a sawi a. UD&PA hnathawh chu khawpui tihhmasawn a nih piahlamah khawpuia cheng retheite chawikan a tel, tiin, sawrkar laipui pawhin a ngaipawimawh hle tih a sawi a ni. Self help group kaltlanga hmeichhiate hmalakna a ropui a tih thu sawiin, faina kawngah pawh tan la tel zel turin beneficiary-te a chah bawk.
DAY-NULM Exhibition cum Street Food Festival hian March 16 thleng a awh dawn a. DAY-NULM hnuaia beneficiary ten an thil siam hrang hrang hralh theih turin an phochhuak a ni. Exhibition stall 21 bakah Food Court 8 siam a ni.