DC office-a Mizo tawng thiam lo dah hi sawrkarin tha a ti lo – DP&AR minister

DC office-a Mizo tawng thiam
lo dah hi sawrkarin tha a ti lo
– DP&AR minister
Deputy commissioner office-a Mizo tawng thiam lo dah chu district mipuiin an tawrh thin avangin, hnamdang pawh nise, Mizo tawng eng level emaw tal thiam ni thei turin ruahmanna an siam mek tih Department of Personnel & Administrative Reforms minister K Sapdanga chuan a sawi.
Thawhlehnia Assembly Session-a zawhna leh rawtna – district-a deputy commissioner-ah Mizo tawng thiam lo an awmin an district mipuiin harsatna an tawk thin a, Mizo tawng thiam ngei dah nise, tih lut chu chhangin, hemi chungchang hi DP&AR chuan a sawiho fo tawh a, district mipui lamin harsatna an nei a, rawtna an nei bawk tih DP&AR hian a sawi.
India ram state lian thenkhat chuan an cadre post-a kaisanna tur, hmun dang amite promotion exam an buatsaihin ‘local language’ an thiam em, tih an lo endik thin a. Mizoram state-in cadre hran a la nei lo chungin, he kalphung hi zawm ve a tha awm mange tih ngaihdan a awm tih a sawi.
IAS junior-te state dang atangin an lokal a, a tlangpuiin district exposure an duh a, mipui nghenga hnathawh chu an promotion atan a pawimawh avangin district office-a thawh an rawn dil ngawih ngawih thin tih K Sapdanga hian sawiin, “Hei hi an carrier leh service atan a pawimawh a. Engemaw chen chu lo ngaihpawimawh loh theih an ni loa, chutihrualin service officer-te ngaihpawimawh avanga mipuiin an tawrh kha sawrkarin a remchang loin a hria a, DP&AR chuan tun chinah chuan hnamdang, tualchhung tawng hre lo, district adminstration office-a tirh ngawt hi a tha lo a ni, tiin, district office-a an awm duh a nih chuan Mizo tawng eng level chin emaw bituk neiin thiam tir hmasak thin nise, tih ruahmanna a awm a, tihhlawhtlin ngei pawh tum a ni,” a ti.
Mizo tawng thiam duh lo emaw zir peih lo emaw an awm a nih chuan district lamah an intir bik tawh lo a ni ang chu, tih ngaihdan a awm a, tihpuitlin ngei pawh an tum tih a sawi a ni.