DC&MA leh NECS inremna cancel ka ngen – C Ngunlianchunga, MLA

DC&MA leh NECS inremna cancel
ka ngen – C Ngunlianchunga, MLA
Sawrkarin consultancy firm a hman thin zing ami North East Consultancy Services (NECS) neitu nia puh, tun MNF sawrkara minister ni bawk Robert Romawia Royte chanpualah District Council & Minority Affairs department pek thar a nih avangin he department leh NECS-in thawhdunna kawnga thu an thlun mek chu cancel sak turin sawrkar a ngen tih MLA C Ngunlianchunga chuan a sawi.
Lawngtlai West bialtu MLA C Ngunlianchunga sawi danin, 2022 June 17 khan DC&MA department leh NECS hian deed of agreement an ziak a. Heta NECS neitu leh hming ziahhnantu chu Vanlalfelpuia Royte s/o Robert Romawia Royte a ni tih a sawi. “NECS neitu hi DC&MA minister Pu Robert Romawia Royte fapa a nih avangin sawrkar kalphung leh Representation of People’s Act 1951 Section 9 (A) a kalh a. Deed of agreement hi cancel turin sawrkar ka ngen a ni,” a ti.
Mizorama sawrkar kal laiah DC&MA department kaltlangin sports infrastructure-ah Lawngtlai district tan PMJVK scheme atangin cheng nuai 11376.39 lakchhuah a ni a. Infiammite tan a lawmawm em em rualin, Autonomous District Council huamchhunga awm mipui tan erawh an thawh ve theih tur awm ang hna zaa 99 chu tute emaw duhsak bik firm pek an ni vek tih MLA hian a sawi.
Hetiang a nih lai hian DC&MA chu a changtu minister R Lalzirliana hnen atangin minister Robert Romawia Royte hnenah pek a ni zui ta nia sawiin, “A fa firm leh DC&MA-in deed of agreement an sign tawh hnu a, pa ber hna chanpuala chief minister-in a pe leh hian thluaka sum lut an sawi fo hi an pahnih hian an ni tih a chiang a. Hnung thak inhiahtawnna awm ngei nia a lan bakah MNF sawrkarin ADC area mipui engahmah a ngaih loh zia a tichiang hle bawk,” C Ngunlianchunga hian a ti.