Eiruk vanga thiam loh chantir Officer pahnih tan kum 5 leh kum 4

Eiruk vanga thiam loh chantir
Officer pahnih tan kum 5 leh 4
Excise & Narcotics Department sum eiruk thubuaia court-in thiam loh a chantir mi pahnih chu kum 5 leh kum 4 chhung lung in tang turin a hrem a. Sumfai cheng nuai 180 leh nuai 30 chawi turin a ti bawk.
Tarlan tawh angin, Excise & Narcotics Department Office Serchhip District sum cheng nuai 181 chuang tihchingpen a ni a. Heng zinga nuai 4 chuang hret chu office mamawh leina leh bill pekna atana hman anih avangin he thubuai ngaihtuahtu Prevention of Corruption Act special judge court chuan thiam loh a chantirnaah hian telh zui loin Rs. 1,73,48,365 eiruknaah, hetihlaia he office-a superintendent, DDO ni bawk H Rongura, Luangmual Aizawl leh he sum eirukna kaihhnawiha thamna Rs. 41000 lo la ve tu, hetih laia Serchhip Treasury Office-a assistant account officer Suakngura, P&E Veng Serchhip chu kumin March 17 khan thiam loh chantir an lo ni tawh a ni.
PC Act court special judge Dr HTC Lalrinchhana chuan March 20 khan an pahniha hremna tur hi tichhuakin, H Rongura hi kum 5 chhung lung in tang tur leh sumfai nuai 180 chawi turin a ti a. Sum chawi tur hi a pe thei lo a nih chuan kum 90 dang tan belh turin a ti.
A hremna hi case chi thum a ni a, kum 5 theuh tang tur leh cheng nuai 60 theuh chawina tur niin, a sumfai chawi tur hi a pe thei lo a nih chuan kum 30 theuh tan belh theihna a ni. Amah H Rongura hi kum upa lam tawh, sawrkar hna atanga chawl tawh, hetiang dan bawhchhiatnaa inhnamhnawih zui tawh lo tura ngaih a nih avangin, a tan chhung tur hi chu hmun khata lakhawmin kum 5 chauh tang turin court hian a chungah zahngaihna a lantir a. A sumfai chawi tur leh sum chawi tur a neih loha lung ina tan belha a tlak tur erawh a mal theuha belhkhawm a ni ta thung a ni.
Suakngura hi kum 4 chhung lung in tang tur leh sumfai nuai 3 chawi turin court hian a hrem a. Sum chawi tur hi a pe thei lo a nih chuan kum khat leh a chanve chhung lung in tan belh tura tih a ni.
A ni pawh hi case chi thumah tho thiam loh chantir a ni a. Kum 4 chhung theuh lung in tan theihna, cheng nuai khat theuh chawi tura tihna leh sumfai chawi tur hi a pe thei lo a nih chuan thla 6 dang theuh lung ina tan belh theiha hrem a ni a. Amah Suakngura hi kum upa lam tawh, hetiang dan bawhchhiatnaa inhnamhnawih zui tawh lo tura ngaih a nih avangin, court hian zahngaihna lantirin a tan hun tur hi hmun khatah lakhawmin kum 4 tang turin a ti a. A sum chawi tur leh sumfai chawi tur a pe lo a niha a tan hun tur erawh a zavaia belhkhawm a ni ve bawk.
Prevention of Corruption Act special judge chuan he thubuai hi court-in a la thutak hle tih sawiin, sum eiruk zat felfai taka finfiah a nih vang leh a tam tham em avangin PC Act 1988 hnuaia section 16-na tarlan angin, an sum eiruk mil hisapa sum chawitir an nih thu a sawi.
Treasury pisa-a thawkte thamna lak hi a pawi hle tih sawiin, “Hetiang a nih chuan a lang apau emaw sawilang kher lo pawhin sum pekchhuah tur tih khawtlai sak emaw hmangte in Treasury pisa-a thawkte hian thamna an phut fo thei dawn a. Hetiang thubuaia hremna hi thuhnu dawn taka ngaihtuah a ngai a ni,” Dr HTC Lalrinchhana hian a ti.