DC&MA minister-in centre dawr Mizoram ngaipawimawh turin ngen

DC&MA minister-in centre dawr
Mizoram ngaipawimawh turin ngen
New Delhi-a cham mek District Council & Minority Affairs minister Robert Romawia Royte chuan Inrinni khan Union Minority Affairs minister Smriti Zubin Irani kawmin PMJVK guidelines siamthaa Mizoram puma scheme-in a tuam thei tawh tur chu lawmawm a tih thu a hrilh a. Hun rei tak Mizoram district 8-te chuan PMJVK hnuaia hamthatna an dawn theih loh avangin hengte cover tura Mizoram sawrkarin project a siamte chu ngaipawimawh turin a ngen.
DC&MA minister chuan kum kaltaa PMJVK sanction thar awm lo chu pawi a tih thu a sawi a. India ram state hrang hrang ang thoin Mizoram tan pawh thil hrilhhaithlak tak a ni, tiin, Mizoram chuan sum dawnsa tluang taka a hman theih avang leh a taka project thawh zawh chin a san tawh avangin a bika ngaihtuah a phu tih a sawi a ni.
Minority Affairs minister Robert Romawia Royte chuan Mizoram sawrkarin PMJVK scheme chu tha taka a kalpui thu leh 2nd instalment sanction thuai a ngaih thu a sawi a. Sanction hmuh tirh lama Covid leng avanga hna tan muan deuh awm mah se, tunah chuan hnathawh a kaltluang a, project tam tak zawh tawh niin zawh mai tur tam tak a awm thu a sawi bawk.
Mizoram minister chuan District Council area tan a bika project an siam thu sawiin, sanction a nih thuai theihna’n tanpuina a dil a. Union minister hian theihtawp chhuahpui a tum thu a lo hrilh.
April 5 zan khan Robert Romawia hian Union Minister of State for DoNER BL Verma kawmin Mizorama 6th Schedule area-te tana a bika ruahmanna siam tul a tih thu sawiin, rawtna a sawipui a. Union Minister of State for Minority Affairs John Barla Royte pawh kawmin Mizoram mamawh hrang hrang a sawipui.
Minister Robert Romawia Royte leh MP C Lalrosanga te chuan Union Finance secretary TV Somanathan kawmin Finance ministry-in a puih thinnaah lawmthu an hrilh a; Mizoramin a bika ngaihtuah a ngaihna leh a chhan an sawipui. Union Finance Secretary pawhin an thu thlente chu ngaihtuahpui a tum thu a lo hrilh.