SASCI sum lapse chungchanga ZPM MLA-ten MNF Legislature Party-te public debate puia an chona chu an ngam thuin chhanglet mah se, an tihhlawhtlin sak ta lo tih MNF MLA Er Rohmingliana chuan a sawi.
Zirtawpnia MNF office, Mizo Hnam Runa inkhawmah MNF Legislature Party secretary Er Rohmingliana chuan, SASCI sum lapse chungchangah ZPM chuan MNF Legislature Party chu public debate puia an chona social media-ah an thehdarh a, an chona hi an ngam thua chhangletin, an chhanletna lehkha hi social media vela thehdarh ve mai loin, amah ngeiin a pe tih a sawi.
“Special Assembly ngeia sawiho nise, tiin kan rawt a. Tawnzau eng ha boxer-ten, tawnzau pawl ha boxer-te inhnek puia min sawmna hi kan pawm thlap a, boxing ring neitute an nih anga ring lo buatsaih tura kan rawtna chu a takin an ti hlawhtling ngam ta lo a ni. Social media lama debate ngam lo anga min sawi hi thubelhchian dawl lo a ni,” a ti.
SASCI sum lapse chungchanga Assembly House-a a zawhna leh a thusawite enlet theih vek a ni tih sawiin,”Thudik hrula thu belhchian dawl lo hmanga mipui rilru hruaipen an tum fo hi ZPM hian sim rawh se,” a ti.
ZPM-in thuchhuah an siam duh thin danah tunlai khuarel chhiatna thleng chungchangah pawh hamthatna lak nana hman an tum nia a lan thu Er Rohmingliana hian sawiin, “Mi chhiat tawhna kara hamthatna lak lo tum hi a zialo takzet,” a ti.
Debate neih puia kan chona ZPM-in a tihhlawhtling ta lo – Er Rohmingliana
Get real time updates directly on you device, subscribe now.
Prev Post