Defence minister hmaah Mizo Pipe Band-in an thiam an entir
Defence minister hmaah Mizo
Pipe Band-in an thiam an entir
Govt. Mizo High School-a 20 Battalion NCC Pipe Band chuan Director General National Cadet Corps, New Delhi-ah Defence minister Rajnath Singh hmaah Thawhtanni khan band display an nei.
20 Bn NCC hi kumin Republic Day parade-ah NCC Directorate 17 atanga 4 thlanchhuah zingah an tel a, band dang pathum – Scindia, Pilani leh Kerala atanga tel tur te chu brass band vek niin, Mizoram chauh hi pipe band an ni.
Tun tuma tel tur pipe band-ah hian cadet 45 awmin, band master pathum – mipa pakhat leh hmeichhia pahnih an awm a. Piper 26, bass drummer 2, tenor drummer 4 leh side drummer 12 an awm a ni.
20 Bn NCC Pipe Band hi nikum July thla tira Shillong-a NCC NER Directorate-a intihsiakah pahnihna niin, hmarchhak state pasarih zingah anmahni chauh hi pipe band awm an ni.
Intihsiakah hian dinhmun sangber hauhtu nilo mah se, an Battalion administration officer Lt.Col. Kumud Maini chuan New Delhi-a Republic Day parade-a tel tir a tum ruh hle a. NCC ADG Maj. Gen. Gagan Deep a hmin hnuin, Director General NCC New Delh chu pipe band play lai video an thawn a. DG pawh hian an thiamna chu pawmpuiin, Republic Day parade 2025-a tel turin selection letter chu nikum September khan a rawn thawn a ni.
Chief minister Lalduhoma, Sports & Youth Services department leh Finance department te nen tanghoin, chief minister hian pipe band tan hian cheng nuai 19 a sanction a. Nuai 12 hi an hmanraw thar, Delhi-a leina atana hmangin, a bang nuai 7 hian an uniform tur, Thenzawlah puanchei an tahtir a, an flag-te hi army zaari work siamna awmchhun Punjab-a Malerkotla khuaah an siamtir bawk.
An uniform design tute hi NCC ADG Maj. Gen. Gagan Deep leh adm officer Lt. Col Kumud Maini te an ni.
2024 December 27 zinga Delhi an thlen hnu in, 20 Bn NCC Pipe Band hian India Vice President leh Chief of Army Staff te hmaa band display nei tawhin, India Gate leh National War Memorial-ah pawh an display tawh a ni.
Govt Mizo High School Pipe Band hi 2000 June 26-a din niin, 20 Bn NCC an zawm a ni. kum 2007- 2017 chhung khan Republic Day Camp-ah hian an lo kal tawh a. 2013 batch chu DG NCC-in thiam a tih avangin ‘DG Recommendation’ a thawn a; hei hian trophy, thuziak leh sumfai a kengtel a ni.