Kan taksain tui a hloh a hnem lutuk chuan ‘dehydrate’ kan ti a, kan lo chau a, tha te a khur der der thei a, khaw hmuh te pawh a phe ruai thei. Dehydration awm theihna chhan chi hrang hrang a awm a chung zingah chuan chuan kawtha lo leh luak te, khawsik nasa te leh exercise lak emaw inkhelh emaw avanga thlan tui chhuak nasa te hi kan hriat lar deuh te chu a ni awm e. Hetianga kan dehydrate lai hian ei loh tur leh in loh tur a awm niin Times of India health section-in an tarlang a, kan rawn chhuah chhawng e.
1. Thei tui: Thei tui in mai theih tura an siam sa, a bur nei a dawra an zawrh te hian calorie an pai tam a, chuvangin dehydration laia in loh tur a ni. Heng thei tui te hian carbohydrate an pai tam a, chu chuan pum nuam lo te a thlen zawk hlauh thei.
2. Detox tea: Thingpui hian antioxidant a pai a, taksa hriselna atan thatna chi hrang hrang a, mahse, detox tea te hi chuan mi a ti-dehydrate belhchhan thei a, chuvangin kaw nawm loh leh pum a chian loh lai, dehydrate lai chuan in loh a tha ber.
3. Beetroot: Beetroot hian diuretic properties a nei a, zun a titam duh a, chuvangin dehydration a tizual thei a, khawthat loh lai te chuan ei loh a tha zawk. Beetroot hian thin (liver) a inthuahfai tir a, potassium a pai hnem bawk a, chu chuan taksa atangin tuiril a paih chhuak hnem thin. Chuvangin, dehydrate lai chuan beetroot eih loh a tha.
4. Soda: Soda an telh tamna heng coca cola, pepsi, fanta, sprite etc ang chi te hian chini an pai tam a, chu chuan hypernatremic effect a nei a, tan tissue atangin tui a lachhuak nasa thin a mi a ti-dehydrate belhchhan thei.
5. Thil kanro: Kanro (fried foods) hi a hrisel loh tih kan chu kan hre theuh ang, mahse, tui kan ti miau si a kan ei leh mai thin, heng fried food-te hi mi ti-dehydrate belhchhah theitu an ni. Tin, fried foods ei hian soft drinks in tel a awl riau lehnghal.
6. Coffee: Coffee i in zawhah i ka a ro deuh hulhin i hre thin em? A chhan chu caffeine-in mi a tih-dehydrate theih vang a ni, chuvangin coffee chu in tam lutuk loh tur a ni a,m nikhatah no hnih khat a tawk viau a, dehydration lai chuan in loh a tha ber.
7. Zu: Zu hian kan timur atangin tuiril a sawr chhuak a, mi a ti-dehydrate nasa thin. Zanlama zu inhnem deuh chuan a tuk zingah tui a hal deuh huam huam thin hi. Dehydration atan beer a tha ti a lo sawi tawk te pawh an awm maithei, mahse, hei hi chu thubelhchian dawl lo a ni tih hriat reng tur.
8. Energy drink: Dehydrate laia in atan a that hmel khawp mai, mahse, in loh tur a ni zawk. Energy drink te hian kan taksa a tuiril awm te an paihchhuak nasa thin. Energy drink in nasa lutuk te hian pum lam fel lo a thlen thei zawk a ni.
Dehydrate laia ei leh in loh chi
Get real time updates directly on you device, subscribe now.
Prev Post