Delhi-a ui man khawmna thupek duh lotute man
Supreme Court-in Delhi-NCR huam chhunga neitu nei lova khawlaia ui tlate chawlhkar riat chhunga khungkhawm vek tur tura thu a pek duh lohna lantirtu ran dikna chanvo humhalhtu, chhanchhuaktu leh ui hmangaihtute chu Thawhtanni tlai khan Delhi Police-in an man.
ANI-in a tar lan dan chuan court thupek duh lohna hi India Gate bulah an lantir a ni.
“Lungawi lohna lantir phalsak kan ni lo va, uite hi humhim kan duh a. Ui tam tak awm theihna tur hmun a awm lo va, a tawpah uite hi Delhi pawnah dah chhuakin an thi mai dawn a ni,” tiin an zinga pakhat chuan police-in an lak lak hian ANI hnenah a sawi.
Thawhtanni chawhma khan Supreme Court chuan Delhi leh National Capital Region (NCR) huam chhuia ui tlate chu an awmna tur bikah chawlhkar riat chhunga dah khawm vek turin a ti a. Court hian heng ui man khawmte hi chhuah leh an ni dawn em tih a sawi chiang lo.
Justice pahnih, JB Pardiwala leh R Mahadevan awmna bench chuan ui tla mai maiten mi an tihnat fo avanga ‘ralkhel leh buaina’ awm chungchanga anmahni thu put luh ngaihtuahin man khawm tura thupek tibuaitu mi mal leh pawl awm lo turin an ti.
Delhi-NCR thuneitute chu ui seh tuarten an thlenna tur helpline siam turin a ti bawk a, hetianga betute chu darkar li chhungin a sehtu ui man ngei turin a ti bawk.
“Veng tin, Delhi dai thlengin, khawlaia ui tlate chu man khawmin hmun dangah sawn vek tur a ni a… Tihchin emaw, a nih loh pawhin khawtlang hi a himin a zalen tur a ni a. Chhehvelah ui tla mai mai aawm tur a ni lo,” tiin bench hian thupek a chhuah.
Hetih lai hian hlawkna nei lova ran dikna chanvo humhalhtu, People for the Ethical Treatment of Animals (PETA) India chuan Supreme Court thupek chu ‘tih chi loh, tih dan phung lo leh dan lo’ tiin an sawi.
“Ui awmna siam loh emaw, tantir emaw hian engmah a thlen ngai lo. Hetiang hmalakna hian ui awm zat a titlem chuang lo va, ui a seh leh ui seh a veng lo va, uite hi an awmna hmun ngaiah an let leh mai zel a ni,” tiin PETA India-a veterinary affairs senior director Dr Mini Aravindan chuan a sawi.