Delhi leh Kolkata-ah Kut hmang

Delhi leh Kolkata-ah Kut hmang
Mizoram Art & Culture Department leh Delhi Mizoram House hmalaknain March 13 khan Delhi-ah Chapchar Kut hman a ni a. Sawrkar laipuia additional controller general of Accounts Zothankhuma chu ‘Kut Pa’ niin resident commissioner Shweta Chauhan chu Kut Thlengtu a ni.
Chapchar Kut lawmnaah hian Delhi Mizo Zirlai Pawl Cultural Troupe-in hnam lam chi hrang hrang an entir a, mimal zai ngaihthlak a ni bawk.
Delhi-a Chapchar Kut hi Rajya Sabha MP K Vanlalvena, MADC chief executive member M Laikaw, minister hlui F Malsawma leh Mizo senior officer leh mi engemawzatin an chhim.
Inrinni khan Kolkata-ah pawh Calcutta Mizo Welfare Association (CMWA) chuan Chapchar Kut an lawm a, ‘Kut Pa’ nia hmanpuitu minister Dr Vanlalthlana chuan Mizoram tan Kolkata chu kawtchhuah ber a ni a, Kolkata-a Mizo fa cheng leh khawsate chu Zo nun zemawi lan chhuahtir kawnga hun rei tak atanga tha lo thawh tawh thin an ni, tiin, dam lo leh mitthi ruang buaipui bakah harsatna tawk hrang hrangte tlawmngaih chhuahin an pui thin tih a sawi. Kumin Chapchar Kut thupui angin CMWA chuan inrem leh inlungrual takin Mizo hnam tan hna an lo thawk tawh thin anga Mizo hnam tana malsawmna an lo nih tawh thinna vawngnung zel turin a chah.
Kolkata Mizoram House joint resident commissioner Zoremthara Ralte chu Kut Thlengtu a ni a. Intihhlimna hun hrang hrang hman niin, Mizo welfare member-te bakah damlohna leh tul dang avanga cham mek mikhual engemawzat nen hman a ni.
CMWA president C Lalmuanzuala sawi danin, tun dinhmunah Kolkata-ah Mizo sang chuang an awm mek a, chu’ng zinga 703 chu Mizo Welfare-a inziaklut an awm. A pawimawhna hria in, Kolkata leh a chhehvela Zofa zawng zawng chu Welfare member-a inziaklut theuh turin a sawm a ni.