Demand sawihona leh mipui …

Budget session kal mekah, nimin atang khan Demand for Grants sawihona neih tan a ni a. Nimina sawihote hi minister pathum chanpual, belhkhawma department 10, cheng vaibelchhia 2,382.18 hu, budget estimate pumpui atanga 16.7% a ni.
Budget session hi mipui en theih tura Live-a pekchhuah a nih thin tak avangin session neih lai hi chuan mipui lam pawhin hna dang thawhsan hleithei bik lovin ngun takin mahni remchan ang angin an thlir thin a. A nihna takah chuan mobile phone nei tawh phawt chuan ni khatah vawi khat emaw tal hi chu an thlir hialin a rinawm.
Hetia live-a session thlir theih a nih tak avang hian mipui lamah pawh ram politics ngaihvenna lamah nasa takin hmasawnna a thleng a. Tunhmaa politics ngaihsak lem lote pawhin ram inrelbawl dan an varpawh phahin, ngaihtuahna thuk zawk nen kan ram politics hi an ngaihven phah a, chu chu hmasawnna pawimawh tak a ni nghal awm e.
Mipui lam chuan, kan aiawha rorel tur leh dan siam tura kan thlan chhuah legislator (MLA)te hi ram inrelbawlna kaihhnawih thil hi chu ‘master’ hle tur angin kan ngaiin kan hmu lo thei lo va; chutiang ni tura beisei pawh chu an ni reng bawk a.
Hetih lai hian, Demand for Grants sawihonaah, minute 10 theuh hun an hman chhung hian, Member, a tam zawk pawh an ni hial thin ang, te chuan mahni bial chhunga mamawh leh complaint thlenna hunah an hun an hmang zo deuh vek thin a. Department enkawlna tura sum ruahman a nih dan hi mipui lam tan chuan han hriat ve phak hi a ni tawh thin lo va. ‘Chumi department-ah chuan chutiang khatiang chuan sum hman tur a ni a, hei hi kan mamawh dan thlirin heti zawnga siksawi deuh a tul lo maw? Hei hi a va tlem ve? Hei hi a va tam ve? tia dodalna emaw, rawtna emaw, han auchhuahpui dap dap thawm hi hriattur a tam lo hle a. Mahni bial chhung bak, budget behchhana a state pum huap anga thlirna emaw ngaihdan emaw han thawh pap pap hi an tam lo hle bawk.
Mipui lam chuan budget estimate atangin eng hmasawnna thar nge awm thei dawn tih te an lo ngaihvenin an lo hre chak a. A bikin kuthnathawktute kaihhnawih deuh bik heng department – agriculture, horticulture, sericulture, fisheries, Ah&Vety etc. ah te hi chuan, eng nge thil thar, hmasawnna thar a awm dawn em tih hriat chakin an lo ngaihven deuh bikin, ring an lo fan ve thin a ni.
Ram rorelna in sâng bera lawi lut pha, mipuiin aiawh atana tling leh tlaka an ngaiha an thlanchhuah chinte hi chuan, zahawm takin rorelna in hi vawng thei se a duhawm hle bawk.