Democrats te hnawl tan thawk ang ti

Donald Trump-an vice-president atana a thlan JD Vance chuan Democrats tena ‘an hnawl leh theihnghilh’ working-class Americans te tana theihtawp chuaha a beih tur thu a sawi.
Americans maktaduai tel te hnena TV kaltlanga a inhmelhriattirnaah Ohio senator chuan US Midwest a tlawm taka a seilen dan sawiin ‘career politicians’ President Joe Biden te chu a sawisel a.
Milwaukee, Wisconsin a Republican national Convention neihnaa a thusawiah Vance chuan Trump chu Americans te ‘beisei tha ber’ tiin a sawi.
Trump leh a running mate te hian November thla inthlanah Democratic White House ticket a ding tur Biden leh Vice-Presidnet Kamala Harris te an khing dawn a ni.
X kaltlangin Biden chuan Vance hi a thusawi zawh hnuah abortion leh Ukraine chungchangah an beilet zui nghal bawk a.
Kum 39 leka upa Vance hi thlantlin a nih chuan US history a vice-president naupang ber a ni dawn a ni.
Thusawina a neihah Vance chuan Ohio a khawte takte atanga naupang nun hrehawm tak a neih atanga US Marines, Yale Law School leh US Senate a nih dan te a sawi a ni.
Vance hi best-selling memoir Hillbilly Elegy, Applachian coal country a chhungkaw rethei tak chanchin ziaktu a ni a. “American ruling class” te chuan trade agreements leh foreign wars te hmangin an khua leh community ang te chu an tichhia a ni tiin a sawi.
“Iraq atanga Afghanistan, financial crisis atanga Great Recession, open border atanga hlawh sang thei lo, he ram hruaitute hi an hlawhchham nawn awn awn a ni” a ti a.
“Donald Trump hi America ropuina tungding leh tura beiseina awm chhuna ni tawh. Kan hloh leh a nih chuan kan hmu leh tawh ngai lo mai thei” tiin a sawi bawk a.
“Working-class boy, thuneihna hall atanga hlataka piang chu he dawhsanah hian a ding thei a nia” tiin a sawi bawk.
Vance, Indian immigrant fanu Usha Vance lawyer ni bawk nupuia neitu chuan US chuan mithar te a lo lawm thin, mahse, foreign labour a chawlut ngai lo a ti a.
“Mithar kan lo lawm hian kan term angin kan hnena an awm kan remti thung” tiin a sawi.
Vance hian a hma in Trump a thlawp ngai lo va, na taka lo sawisel tawhin ‘idiot’ tia sawiin ‘America’s Hitler’ ni thei tihialin a lo sawisel tawh a. Mahse, a hnuah Trump lamah a tang ta hlauh thung.
Trump atanga president’s endorsement hmu in kum 2022 khan Senate ah thlantlin a ni a. Democrats te chuan tun hmaa Vance an thusawi a lo neih tawh te chu amah beih nan hmangin ‘Ukraine a thil thleng ka ngaihven vak lo’ a tih leh ram pum huapa nautihtlak khap a thlawp thu a sawi te chu an thehdarh ve thung.
Nautihtlak khap chungchangah chuan official Republican platform milin a inherrem a, chumi ang chuan nautihthlak khap chu State te thuneihna a ni tih a ni.
A thusawinaah erawh Ukraine chungchang a sawi lova, foreign policy chungchang pawh a sawi tam lo bawk.
Vance chuan US allies te chuan world peace a awm theih nana phurrit an phur ve tur a ni tia sawiin Trump presidency hnuaiah chuan America chuan buaina pumpelh a duh dawn a, mahse, nawrluih a nih chuan a hnekna khawp ang tiin a sawi.
Trump thah tuma beih a nih chungchang pawh sawiin, “Nunrawng tiin an sawi a” tia sawiin, “Engti kawng pawhin thuneihna a chanloh nan dan tur an ti a. Mahse, engtin nge Trump an a chhan let? Ram pum inlungrual ang u a ti” tiin a sawi bawk.