Department lirthei hlui zual thlaknan lirthei thar 27 leisak

Department lirthei hlui zual
thlaknan lirthei thar 27 leisak
Sawrkar laipuiin boruak bawlhhlawh tih tlemna atana policy a duan hnuaiah Mizoram Transport department kaltlangin sawrkar department 17-a an lirthei hlui zual thlaktu tur lirthei 27 lei thar a ni a. Ningani khan Transport minister Vanlalhlana’n a dawngtu department aiawhte hnenah lirthei document nen a hlan.
Boruak bawlhhlawh tih ziaawmna pakhat atan sawrkar laipui Ministry of Road Transport & Highways (MoRTH) chuan SASCI Part-II kaltlangin Voluntary Vehicle Modernization Policy (V-VMP), Vehicle Scrapping Policy (VSP) tia hriat bawk duangin, lirthei hlui tawhte hluihlawn a, a thara thlak tura lirthei neitute tana ruahman a ni. V-VMP in a tum chu, air polution tih tlem, kan environment tithianghlim a, lirthei hlui tawh lutuk avanga chetsualna thleng thin tih tlem bakah fuel efficiency tih san a, maintenance cost tih tlem a ni. Automotive, steel leh electronic industry-te tan recycle hmanga man tlawm zawka eaw material tih tam leh mi tam tak tan eizawnna siam a ni.
VSP hnuaiah hian commercial leh passenger lirthei fit tawh lote mahni thua hluihlawn tir a, sawrkar lirthei kum 15 aia upa tawh chu registration tih thih vek, private leh sawrkar lirthei kum 15 la ting lo pawh Automated Testing Stations-in fit lo a tih chu a huam vek dawn a; private lirthei kum 20 tling tawh registration tih thi vek a ni dawn a ni. Hei vang hian department tin ten RVSFs peifel hma chuan an lirthei kum 15 tling tawh chu normal condemnation ti vek turin an ngen tih Transport department hotute chuan an sawi.
He policy hian hamthatna – non-transport vehicles ah tax 25% discount, transport vehicles ah tax 15% discount a keng a. Registration fee a thlawn a, lirthei siamtu company-ten lirthei thar an lei hunah discount an pe bawk ang.
MoRTH hian V-VMP kalpuiina atan hian mel lung hrang hrang a duang a. Hemi pakhat tihhlawhtlin hian incentive cheng vaibelchhe 3 a pe. Mizoram pawhin mel lung pakhat a tihhlawhtlinnaah incentive dawng tawhin, hemi hmang hian lirthei 27 hi Government e-Marketplace (GeM) atanga lei a ni a, cheng vaibelchhe 2.4 sen a ni. Registration, smart card leh thil pawimawh dang siamna leh lirthei tina petrol litre 5 theuh an inkhalhchhuahna atana thun nen, a vaia sum sen hi cheng vaibelchhia 2.8 a ni. V-VMP hnuaiah hian Mizoram sawrkar hnuaiah lirthei 93 chu recycle tura tih chhiat a ni dawn a ni.